وزیراعظم بجلی ریلیف پیکیج اچانک ختم، صارفین کو جھٹکا

بجلی کے صارفین کو دی جانے والی 7 روپے 41 پیسے فی یونٹ سبسڈی پر مشتمل وزیراعظم ریلیف پیکیج بغیر کسی پیشگی اطلاع کے اچانک ختم کر دیا گیا، جس سے لاکھوں شہریوں کو شدید مایوسی کا سامنا ہے۔

یہ ریلیف گزشتہ سال اپریل میں وزیراعظم شہباز شریف کی جانب سے موسم گرما میں بجلی کے بڑھتے ہوئے نرخوں کے پیش نظر دیا گیا تھا، لیکن اب اس کی معیاد مکمل ہونے پر بجلی کے بل دوبارہ گزشتہ سال کی پرانی قیمتوں پر جاری کیے جا رہے ہیں۔

شہریوں کی شکایت ہے کہ حکومت نے یہ تاثر دیا تھا کہ بجلی کے بنیادی ٹیرف میں مستقل کمی کی گئی ہے، جبکہ اب معلوم ہو رہا ہے کہ یہ صرف ایک عارضی سہولت تھی۔ شہریوں کا مطالبہ ہے کہ بجلی کی قیمتوں میں مستقل بنیادوں پر کمی کی جائے، نہ کہ وقتی ریلیف دے کر عوام کو گمراہ کیا جائے۔

 حکومتی وضاحت اور تضاد:
وفاقی وزیر برائے پاور ڈویژن، اویس لغاری نے مؤقف اختیار کیا ہے کہ حکومت بنیادی سطح پر ریلیف فراہم کر رہی ہے، تاہم فیول ایڈجسٹمنٹ چارجز میں ماہانہ اتار چڑھاؤ ایک معمول کا عمل ہے، جس کے باعث بلوں میں فرق آ سکتا ہے۔

لیکن دوسری جانب نیپرا (نیشنل الیکٹرک پاور ریگولیٹری اتھارٹی) کی ایک حالیہ سماعت کے دوران، جب صارفین نے استفسار کیا کہ آیا 7.41 روپے فی یونٹ رعایت اب بھی موجود ہے یا نہیں، تو سینٹرل پاور پرچیزنگ ایجنسی (CPPA) کے حکام واضح جواب دینے سے گریزاں رہے۔

نیپرا کے رکن برائے سندھ، رفیق احمد شیخ نے افسران کو تنبیہ کرتے ہوئے کہا براہ کرم، جو سوال پوچھا گیا ہے، اس کا سیدھا جواب دیں۔

تاہم اس تنبیہ کے باوجود حکام کی جانب سے کوئی شفاف وضاحت نہ دی جا سکی، جس پر نیپرا نے عدم اطمینان کا اظہار کیا۔