ایلون مسک کی ملک بدری؟ ٹرمپ کی دوستی دشمنی میں بدل گئی

کل کے دوست، آج ایک دوسرے کے مخالف! امریکی سابق صدر ڈونلڈ ٹرمپ نے دنیا کے امیر ترین افراد میں شامل ایلون مسک کو امریکا سے ڈیپورٹ کرنے کے امکان پر غور شروع کر دیا ہے۔

فلوریڈا میں صحافیوں سے بات کرتے ہوئے ٹرمپ سے سوال کیا گیا کہ کیا وہ ٹیکس بل کی مخالفت پر ایلون مسک کو ملک بدر کر دیں گے؟ جواب میں ٹرمپ نے مختصر انداز میں کہا، "مجھے معلوم نہیں، دیکھیں گے کیا ہوتا ہے۔"

انہوں نے مزید کہا کہ ایلون مسک ان دنوں شدید پریشان ہیں کیونکہ وہ الیکٹرک وہیکل مینڈیٹ سے ہاتھ دھو بیٹھے ہیں۔ ٹرمپ نے طنزیہ انداز میں تبصرہ کرتے ہوئے کہا، "وہ مزید بہت کچھ کھو سکتے ہیں۔"

سابق صدر کو امید ہے کہ ریپبلکن پارٹی کا مجوزہ ٹیکس بل جلد ایوان سے منظور ہو جائے گا۔ اس بل کی منظوری کی صورت میں الیکٹرک گاڑیوں کی خریداری پر صارفین کو دی جانے والی ٹیکس کریڈٹ ختم ہو جائے گی۔

یاد رہے کہ ایلون مسک، جو جنوبی افریقہ میں پیدا ہوئے، ٹیسلا کے بانی اور سی ای او ہیں اور وہ اس ٹیکس بل کے کھلے عام مخالف رہے ہیں۔ امریکی میڈیا کے مطابق الیکٹرک گاڑیوں کی فروخت میں ٹیکس کریڈٹ نے کلیدی کردار ادا کیا ہے، جس کی بدولت صارفین کو مالی فوائد حاصل ہوئے۔