وزیراعظم کی ایرانی سفارتخانے آمد، آیت اللہ خامنہ ای کیلئے نیک خواہشات اور شہداء کیلئے فاتحہ خوانی

وزیراعظم شہباز شریف نے اسلام آباد میں اسلامی جمہوریہ ایران کے سفارتخانے کا دورہ کیا، جہاں انہوں نے حالیہ اسرائیلی جارحیت کے نتیجے میں شہید اور زخمی ہونے والے ایرانی شہریوں کی یاد میں تعزیتی کتاب میں اپنے تاثرات درج کیے اور فاتحہ خوانی کی۔

وزیراعظم آفس سے جاری اعلامیے کے مطابق، اس موقع پر نائب وزیراعظم و وزیر خارجہ اسحاق ڈار، وزیراعظم کے مشیر طارق فاطمی اور سیکریٹری خارجہ بھی ان کے ہمراہ تھے۔

سفارتخانے پہنچنے پر پاکستان میں تعینات ایرانی سفیر رضا امیری مقدم اور دیگر سینئر حکام نے وزیراعظم کا پرتپاک خیرمقدم کیا۔ وزیراعظم نے ایرانی حکومت اور عوام کے ساتھ دلی ہمدردی، افسوس اور مکمل یکجہتی کا اظہار کیا۔

انہوں نے ایرانی عوام کے صبر، استقامت اور حوصلے کو سراہتے ہوئے شہداء کے لیے دعائے مغفرت اور زخمیوں کی جلد صحتیابی کی دعا کی۔

وزیراعظم نے ایرانی سپریم لیڈر آیت اللہ علی خامنہ ای اور نومنتخب صدر ڈاکٹر مسعود پیزشکیان کے لیے نیک خواہشات کا اظہار کرتے ہوئے اس عزم کا اعادہ کیا کہ پاکستان ایران کے ساتھ ہر سطح پر تعاون اور حمایت جاری رکھے گا۔