سانحہ لیاری کے متاثرین کو 80 گز پلاٹس فراہم کیے جائیں گے ، گورنر سندھ

گورنر سندھ کامران ٹیسوری نے لیاری میں عمارت گرنے کے افسوسناک واقعے پر متاثرہ خاندانوں کے لیے ریلیف پیکج کا اعلان کرتے ہوئے کہا ہے کہ متاثرین کو 80، 80 گز کے پلاٹس فراہم کیے جائیں گے، جب کہ سندھ حکومت سے اپیل کی گئی ہے کہ وہ متاثرہ افراد کو چھ ماہ کے کرایے کے برابر مالی معاونت فراہم کرے۔

گورنر نے کہا کہ متاثرہ افراد خود کو گورنر ہاؤس آ کر رجسٹر کریں، اس مقصد کے لیے ایک ہیلپ لائن بھی قائم کی جا رہی ہے۔ بےگھر خاندانوں کو راشن بھی گورنر ہاؤس کی جانب سے دیا جائے گا اور ہر ممکن امداد کی فراہمی یقینی بنائی جائے گی۔

کامران ٹیسوری نے اس حادثے کو نہایت دل خراش قرار دیتے ہوئے کہا کہ عمارت اس قدر اچانک گری کہ لوگوں کو سنبھلنے کا موقع تک نہ ملا۔ انہوں نے سندھ حکومت کی جانب سے تحقیقاتی کمیٹی کے قیام کو خوش آئند قدم قرار دیا اور کہا کہ نظام کی بہتری چہروں کی تبدیلی سے نہیں بلکہ پالیسیوں کی تبدیلی سے ممکن ہے۔

ان کا کہنا تھا کہ ایس بی سی اے کے ڈائریکٹر جنرل کو برطرف کرنا مناسب اقدام ہے، تاہم مزید عملی اصلاحات کی اشد ضرورت ہے۔ نئے ڈی جی کو 24 گھنٹوں کے اندر فعال کردار ادا کرنے کی ہدایت دی جائے گی۔

آخر میں گورنر سندھ نے یقین دہانی کرائی کہ سانحہ لیاری کے متاثرین کو ہرگز تنہا نہیں چھوڑا جائے گا، اور گورنر ہاؤس ہمیشہ ان کے لیے کھلا رہے گا۔