چینی بحران سے نمٹنے کے لیے حکومت نے درآمدی عمل شروع کر دیا، پہلا ٹینڈر جاری

اسلام آباد: وفاقی حکومت نے ملک میں چینی کی قیمتوں میں استحکام لانے کے لیے 5 لاکھ میٹرک ٹن چینی کی درآمد کا باضابطہ عمل شروع کر دیا ہے، جس کے تحت ٹریڈنگ کارپوریشن آف پاکستان (TCP) نے ابتدائی طور پر 3 لاکھ ٹن چینی کی درآمد کے لیے پہلا ٹینڈر جاری کر دیا ہے۔

جاری کردہ ٹینڈر کے مطابق، چینی کی درآمد کے لیے بین الاقوامی سپلائرز اور مینوفیکچررز سے لفافہ بند بولیاں 18 جولائی 2025 تک طلب کی گئی ہیں۔ تاہم واضح کیا گیا ہے کہ 25 ہزار میٹرک ٹن سے کم کی کسی بھی پیشکش کو قابلِ قبول قرار نہیں دیا جائے گا۔

ٹینڈر دستاویزات میں بتایا گیا ہے کہ درآمدی چینی موٹے دانے اور اعلیٰ معیار کی ہونی چاہیے، اور شپمنٹ کے بعد اس کا معائنہ (inspection) لازمی قرار دیا گیا ہے۔ یہ ساری درآمد سرکاری سطح پر ٹی سی پی کے ذریعے کی جائے گی۔

مزید برآں، حکومت نے چینی کی درآمد پر تمام ٹیکسز سے استثنیٰ دے دیا ہے تاکہ بین الاقوامی مارکیٹ سے چینی کی کم قیمت میں دستیابی ممکن بنائی جا سکے۔

یاد رہے کہ گزشتہ ہفتے وفاقی کابینہ نے ملک میں چینی کی ممکنہ قلت اور بڑھتی قیمتوں پر قابو پانے کے لیے 5 لاکھ میٹرک ٹن چینی درآمد کرنے کی منظوری دی تھی۔