عمران خان کے بیٹوں کی واپسی ان کا حق ہے، وہ ضرور آئیں گے: سلمان اکرم راجہ

اسلام آباد: پاکستان تحریک انصاف (پی ٹی آئی) کے رہنما سلمان اکرم راجہ نے کہا ہے کہ عمران خان کے بیٹوں کا وطن واپس آنا ان کا بنیادی حق ہے، اور وہ ضرور واپس آئیں گے۔

اسلام آباد میں پی ٹی آئی کے ارکانِ قومی و صوبائی اسمبلی کے اعزاز میں ایک ظہرانے کا اہتمام کیا گیا، جس میں اپوزیشن لیڈر عمر ایوب اور علی امین گنڈاپور نے بھی اراکین سے ملاقات کی۔

کے پی ہاؤس کے باہر میڈیا سے گفتگو کرتے ہوئے سلمان اکرم راجہ نے کہا کہ ہم لاہور جا رہے ہیں جہاں پارٹی قیادت کے ساتھ ملک کی سیاسی اور معاشی صورتحال پر مشاورت ہوگی۔ انہوں نے کہا کہ اظہارِ رائے کا حق، جو آئین کے آرٹیکل 19 کے تحت حاصل ہے، ہم سے چھینا جا رہا ہے۔

ان کا مزید کہنا تھا کہ ہماری خواہش ہے کہ عوام سے رابطہ رکھا جائے، ان کے مسائل سنے جائیں۔ ہمارا قافلہ محض بات چیت کے لیے لاہور جا رہا ہے، جہاں آج اور کل ملاقاتیں ہوں گی اور اس کے بعد واپسی ہوگی۔

دوسری جانب پی ٹی آئی کے چیئرمین بیرسٹر گوہر نے کہا کہ گرفتاریوں کا کوئی امکان نہیں، ایسی کوئی کارروائی نہیں ہو رہی۔ صرف ارکانِ پارلیمنٹ لاہور جا رہے ہیں اور پنجاب کی قیادت سے بھی رابطہ ہے، وہ بھی پارلیمنٹیرینز ہی ہیں۔

انہوں نے مزید کہا کہ سینیٹ انتخابات کے حوالے سے مشاورت کی ضرورت ہے، اور جمہوری عمل کو مستحکم کرنے کے لیے تمام قوتوں کو مل بیٹھنا ہوگا۔