جنوبی بھارت کی معروف اداکارہ 87 برس کی عمر میں انتقال کر گئیں

بنگلورو: ساؤتھ انڈین فلم انڈسٹری کی معروف اداکارہ بی سروجہ دیوی 87 برس کی عمر میں انتقال کر گئیں۔

انڈین میڈیا رپورٹس کے مطابق ساؤتھ سینما کی ممتاز اداکارہ بی سروجہ دیوی بنگلورو کے علاقے ملیشورم میں واقع اپنی رہائش گاہ پر کئی ماہ کی علالت کے بعد انتقال کر گئیں۔

انہوں نے 1950 کی دہائی کے وسط میں اپنے فلمی کیریئر کا آغاز کیا اور جلد ہی تامل، تیلگو، کنڑا اور ہندی زبانوں کی فلموں میں اپنی اداکاری کا لوہا منوایا۔ 

ان کا فلمی سفر 1955 میں کنڑا فلم مہا کاوی کالیداسا سے شروع ہوا، جبکہ 1955 سے 1984 کے دوران وہ مسلسل 160 سے زائد فلموں میں مرکزی کردار ادا کرتی رہیں۔

اس کے علاوہ وہ تامل سپر اسٹارز ایم جی رام چندرن، شیواجی گنیشن اور این ٹی راما راؤ کے ساتھ متعدد فلموں میں جلوہ گر ہوئیں۔ 

بی سروجہ دیوی کی شاندار فلمی خدمات کی بدولت بھارتی حکومت نے انہیں 1969 میں پدم شری اور 1992 میں پدم بھوشن کے ایوارڈ سے نوازا۔

دوسری جانب بھارتی وزیر اعظم نریندر مودی سمیت ہندی و تامل سنیما کے اسٹارز نے ان کی وفات پر افسوس کا اظہار کیا ہے۔