نامور اداکار البیلا کو مداحوں سے بچھڑے 21 برس بیت گئے

نامور اداکار البیلا کو مداحوں سے بچھڑے 21 برس بیت گئے۔

1941ء میں گوجرہ میں پیدا ہونے والے اختر حسین نے پاکستانی سٹیج اور فلم میں البیلا کے نام سے شہرت پائی، البیلا نے اپنے کیرئیر کا آغاز 70 کی دہائی میں لاہور سے کیا، انہوں نے پہلے سٹیج اور پھر فلم میں اداکاری شروع کی اور ٹی وی پر انہوں نے پنجابی زبان کے کھیل "اک سی بادشاہ"  میں اکبراعظم کا کردار کیا۔

یہ کھیل مغل دور کی مشہور کہانی انارکلی کی پیروڈی تھا، ڈرامے میں البیلا کا کردار بہت سراہا گیا، ڈرامے میں شہزادہ سلیم کا کردار امان اللہ نے ادا کیا تھا، اس ڈرامے کے بعد ان کی جوڑی نے پھر سٹیج ڈراموں میں بھی بہت مقبولیت حاصل کی۔

البیلا نے لاتعداد تھیٹر ڈراموں میں کام کیا، ان کا شمار لاہور کے کمرشل تھیٹر کے مقبول ترین اداکاروں میں ہوتا تھا، البیلا نے 200 سے زیادہ فلموں میں بھی کام کیا، فلم ’’ وارداتیا‘‘ واحد فلم ہے جس میں انہوں نے مرکزی کردار ادا کیا تھا۔

البیلا 17 جولائی 2004ء کو لاہور میں حرکت قلب بند ہوجانے سے انتقال کرگئے تھے۔