اسحاق ڈار کی افغان وزیر خارجہ سے ملاقات،دوطرفہ تعلقات کو برقرار رکھنے پر اتفاق

کابل : نائب وزیراعظم اور وزیر خارجہ اسحاق ڈار کی افغان وزیر خارجہ امیر خان متقی سے ملاقات ہوئی ہے، جس میں دونوں وزرائے خارجہ نے دوطرفہ تعلقات کی رفتار کو برقرار رکھنے اور علاقائی اقتصادی ترقی کی مکمل صلاحیت کے حصول کے لیے اتفاق کیا۔

تفصیلات کے مطابق نائب وزیراعظم اور وزیرخارجہ اسحاق ڈارنے ایک روزہ دورہ کابل میں قائم مقام افغان وزیر خارجہ ملا امیر خان متقی سے ملاقات کی جبکہ وفاقی وزیر برائے ریلوے حنیف عباسی بھی موجود تھے۔

ترجمان دفتر خارجہ کے مطابق دوران ملاقات دونوں وزرائے خارجہ نے دو طرفہ تعلقات کی رفتار کو برقرار رکھنے پر اتفاق کیا۔

 ترجمان دفتر خارجہ کے مطابق دونوں رہنماؤں نے تجارت، ٹرانزٹ اور سکیورٹی کے شعبوں میں تعاون کو وسعت دینے کی مشترکہ کوششوں پر زور دیا،تاکہ دونوں اقوام کو اس کے متقابل فوائد حاصل ہوں۔

اس سے قبل نائب وزیراعظم و وزیر خارجہ اسحاق ڈار افغانستان کے ایک روزہ دورے پر کابل پہنچے، جہاںافغان نائب وزیر خارجہ اور پاکستانی سفیرعبدالرحمان نظامانی نے کابل پہنچنے پر اسحاق ڈار کا استقبال کیا۔

ترجمان دفتر خارجہ کے مطابق دورے کے دوران وزیر خارجہ پاکستان، افغانستان، ازبکستان ریلوے لائن کی مشترکہ فزبیلٹی سٹڈی کے معاہدے پر دستخط کریں گے۔

دفتر خارجہ کے ترجمان کے مطابق اسحاق ڈار کے ساتھ اعلیٰ سطح کا وفد بھی موجود ہے، وزیر خارجہ کے ہمراہ نمائندہ خصوصی برائے افغانستان، وزیر ریلوے اور سیکرٹری ریلوے موجود ہے۔