حج2026 کیلئے درخواستیں جمع کرانے کا دوسرا مرحلہ آج سے شروع

اسلام آباد: حج 2026 کے لیے درخواستیں جمع کروانے کا دوسرا مرحلہ آج سے شروع ہو گیا ہے،جس کے لیے غیر رجسٹرڈ افراد بھی درخواستیں جمع کروا سکیں گے۔

وزارت مذہبی امور کے مطابق رجسٹرڈ افراد کی جانب سے پہلا مرحلہ جو 9 اگست کو ختم ہوا،جس میں سرکاری سکیم کیلئے کم درخواستیں آنے پر غیر رجسٹرڈ عازمین کو موقع دیا گیا، سرکاری سکیم کے تحت 60.3 فیصد درخواستیں موصول ہو چکی، 39.7 فیصد کوٹہ رہ گیا،اسی طرح  6 روز میں 71 ہزار 286 رجسٹرڈ عازمین نے بینکوں میں درخواستیں جمع کرائیں۔

ترجمان کے مطابق ابھی تک ایک لاکھ 18 ہزار 210 کوٹے میں سے 46 ہزار 924 نشستیں بدستور خالی ہیں،اسی طرح دوسرے مرحلے میں وہ افراد بھی درخواستیں جمع کروا سکتے ہیں جنہوں نے رجسٹریشن نہیں کرائی۔

ترجمان وزرات مذہبی امور کے مطابق حج اخراجات کی پہلی قسط کے ساتھ درخواستوں کی وصولی کا عمل 11 اگست سے 16 اگست تک جاری رہے گی،جبکہ درخواستیں کم آنے کی صورت میں کوٹہ مکمل کرنے کے لئے پھر موقع دیا جائے گا۔

اسی طرح12 سال سے کم عمر بچے حج 2026 پر لے جانے کی اجازت نہیں ہوگی، اس کے علاوہ سعودی عرب سے منظور شدہ ویکسین لازمی قرار دی گئی ہے۔

ترجمان کی جانب سے مزید بتایا گیا کہ بیرون ملک رہنے والے پاکستانی حج کیلئے درخواستیں بمع رقم وزارت حج کے نامزد بینکوں میں جمع کرا سکتے ہیں۔

لانگ حج کیلئے پہلی قسط 5 لاکھ روپے اور شارٹ حج کیلئے پہلی قسط 5 لاکھ 50 ہزار روپے رکھی گئی ہے، جیسے ہی حج کوٹہ مکمل ہو گا درخواستوں کی وصولی روک دی جائے گی۔