اسرائیلی سپریم کورٹ کا حکم: فلسطینی قیدیوں کو روزانہ تین وقت کھانا فراہم کیا جائے

اسرائیلی سپریم کورٹ نے حکومت کو سخت ہدایت دی ہے کہ جیلوں میں قید فلسطینی قیدیوں کو روزانہ تین وقت معیاری کھانا فراہم کیا جائے۔ عدالت نے کہا ہے کہ قیدیوں کو بنیادی خوراک سے محروم رکھنا ناقابل قبول ہے اور حکومت اس ذمہ داری کو پورا کرنے کی پابند ہے۔

غیر ملکی میڈیا کے مطابق، اتوار کو تین رکنی بینچ نے متفقہ فیصلہ سناتے ہوئے کہا کہ اسرائیلی حکام قانونی طور پر پابند ہیں کہ وہ قیدیوں کی خوراک کی مقدار میں اضافہ کریں اور معیار کو بہتر بنائیں۔ یہ فیصلہ دو اسرائیلی انسانی حقوق تنظیموں کی درخواست پر آیا جنہوں نے قیدیوں کو غذائی قلت اور بھوک کی صورتحال کا شکار ہونے کا الزام لگایا تھا۔

یہ امر قابل ذکر ہے کہ اسرائیلی فوج نے تقریباً دو سال سے جاری جنگ کے دوران غزہ اور مقبوضہ مغربی کنارے سے ہزاروں فلسطینیوں کو حراست میں لیا ہوا ہے۔ متعدد قیدیوں کو بغیر کسی الزام کے کئی ماہ تک قید میں رکھا گیا، جنہوں نے اذیت ناک حالات مثلاً کم خوراک اور ناکافی طبی سہولیات کی شکایت کی ہے۔

فلسطینی حکام کے مطابق، اس دوران کم از کم 61 فلسطینی قیدی اسرائیلی جیلوں میں شہید ہو چکے ہیں، جن میں مارچ میں ایک 17 سالہ نوجوان قیدی بھی شامل ہے جس کی موت بھوک اور غذائی قلت کے باعث ہوئی۔