پاکستانی خواتین کوہ پیماؤں کی تاریخی کامیابی: 5,400 میٹر بلند بری لا چوٹی سر کر لی

پاکستان کی خواتین کوہ پیماؤں پر مشتمل ایک ٹیم نے گلگت بلتستان میں واقع 5,400 میٹر بلند بری لا چوٹی کو سر کرکے ایک نئی تاریخ رقم کر دی ہے۔

یہ کارنامہ الپائن کلب آف پاکستان کی گولڈن جوبلی تقریبات کے تحت منعقدہ خصوصی مہم کے دوران انجام پایا، جس میں چاروں صوبوں، گلگت بلتستان، آزاد جموں و کشمیر اور اسلام آباد سے تعلق رکھنے والی کوہ پیما خواتین نے شرکت کی۔

قیادت، شرکاء اور تربیت

مہم کی قیادت گلگت بلتستان سے تعلق رکھنے والی بی بی افزون نے کی، جب کہ ٹیم میں دیگر نمایاں شرکاء درج ذیل تھیں:

• اسلام آباد: صحافی مونا خان، آمنہ شبیر، شاہرین خان

• خیبرپختونخوا: ماریہ بنگش

• پنجاب: بسمہ حسن، اقرا جیلانی

• بلوچستان: لاریب بتول

• سندھ: مدیحہ سید

• گلگت بلتستان: زیبا بتول

چار روزہ یہ مہم 7 ستمبر کو اسکردو سے آغاز پذیر ہوئی، جہاں خواتین کوہ پیماؤں نے دیوسائی ٹاپ پر ابتدائی تربیت اور ہائیکنگ کی مشقیں کیں۔ اس دوران انہیں ملک کے معروف کوہ پیما، ساجد سدپارا، اشرف سدپارا، فدا علی اور شریف سدپارا کی رہنمائی حاصل رہی۔

کامیابی اور پذیرائی

الپائن کلب آف پاکستان کے مطابق ٹیم نے 10 ستمبر کو بری لا چوٹی کو کامیابی سے سر کیا۔
وزیر اعظم شہباز شریف نے اس تاریخی کامیابی پر ٹیم کو مبارکباد دی اور انہیں وزیراعظم ہاؤس مدعو کیا۔

الپائن کلب کے نائب صدر کرار حیدری نے اس مہم کو خواتین کے حوصلے، عزم اور صلاحیت کی روشن مثال قرار دیا۔

پاکستان کی نامور خاتون کوہ پیما نائلہ کیانی نے بھی اس کامیابی کو سراہتے ہوئے کہا کہ یہ دیکھ کر خوشی ہوتی ہے کہ نوجوان خواتین کوہ پیمائی کے میدان میں آگے آ رہی ہیں۔ انہوں نے نوجوان نسل کو حوصلہ افزائی کا پیغام دیتے ہوئے کہا کہ وہ بلا جھجک اپنے خوابوں کی تعبیر کے لیے محنت کریں۔

دوسری جانب ساجد سدپارا نے کہا کہ خواتین کی یہ کامیابی نہ صرف متاثرکن ہے بلکہ آئندہ نسلوں کے لیے مشعلِ راہ بھی بنے گی۔