چینی اداکار یو مینگلونگ 5ویں منزل سے گر کر جاں بحق

معروف چینی اداکار یو مینگلونگ ایک رہائشی عمارت کی پانچویں منزل سے گر کر جان کی بازی ہار گئے۔

غیر ملکی میڈیا کے مطابق 37 سالہ اداکار یو مینگلونگ، جو 2017 میں مشہور ڈرامہ Eternal Love کے ذریعے شہرت کی بلندیوں پر پہنچے، بیجنگ کے ضلع چاؤیانگ میں واقع ایک عمارت سے گر کر جاں بحق ہوئے۔

رپورٹس کے مطابق اداکار نے دو روز قبل اپنے ایک دوست کے گھر دعوت میں شرکت کی۔ کھانے کے بعد وہ رات دو بجے سونے کے لیے بیڈ روم میں چلے گئے۔

اداکار کے ایک دوست نے صبح انہیں جگانے کی کوشش کی، لیکن اندر سے کوئی آواز نہ آنے پر جب کمرے میں دیکھا گیا تو وہ موجود نہ تھے۔ بعد ازاں ان کی لاش عمارت کے گراؤنڈ فلور پر ملی۔

اداکار کی اچانک موت پر مداحوں نے گہرے دکھ اور افسوس کا اظہار کیا ہے، جبکہ پولیس نے واقعے کی تحقیقات شروع کر دی ہیں تاکہ موت کی اصل وجہ معلوم کی جا سکے۔