تھر پارکر: معروف لوک گلوکار عارب فقیر 80 سال کی عمر میں انتقال کرگئے

مٹھی : تھرپارکر کے معروف لوک گلوکار استاد عارب فقیر طویل علالت کے بعد سول سپتال مٹھی میں انتقال کر گئے۔

تفصیلات کے مطابق بزرگ گلوکار تپ دق اور گردوں کی بیماریوں کے باعث مِٹھی کے سول اسپتال میں زیر علاج تھے، جہاں انہوں نے آخری سانس لی۔

سول سوسائٹی کی بارہا اپیلوں کے باوجود صوبائی محکمہ ثقافت نے ان کا سرکاری خرچ پر کسی بہتر اسپتال میں علاج کرنے کے لیے کوئی قدم نہیں اٹھایا۔

عارب فقیر نے چالیس سال موسیقی کی خدمت کی اور  مختلف دھنیں کمپوز کیں،عارب فقیر تھری لوک گیتوں اور روایتی صحرائی دھنوں کا استعارہ بن گئے تھے جو ڈھاٹکی، مارواڑی، راجستھانی اور تھری بولیوں میں گائے جاتے تھے۔ 

عارب فقیر کی موسیقی میں ’ لوک دانش’ (عوامی دانش مندی) جھلکتی تھی جو صحرا کی زندگی کی خوشیوں اور غموں دونوں کو سموئے ہوئے تھی۔ان کے سب سے مقبول گیتوں میں ’ ہرمرچو’ شامل ہے، جو پہلی بارش کے بعد خوشی میں اور صحرائی کھیتوں میں کاشتکاری کے آغاز کے موقع پر گایا جاتا ہے۔ 

اسی طرح ’ ڈورو الودعی’ بھی نہایت پُرسوز گیت تھا جو دلہن کے شادی کے بعد والدین کے گھر سے رخصت ہوتے وقت گایا جاتا ہے،یہ وداعی گیت، جو درد اور اُمید دونوں سے بھرا ہوتا ہے، تھر کی شادیوں کا دیرینہ حصہ رہا ہے۔

عارب فقیر کی موت کی خبر تیزی سے پھیل گئی اور شعرا، گلوکاروں اور شہریوں کی بڑی تعداد مِٹھی سول اسپتال پہنچ گئی۔ ان کی میت بعد میں ان کی رہائش گاہ مِٹھی لے جائی گئی جہاں ان کی نمازِ جنازہ ادا کی جائے گی۔

بہت سے لوگوں کے لیے ان کا انتقال صرف ایک فنکار کا نہیں بلکہ صحرا کی ثقافتی روح کو سنبھالنے والی ایک آواز کا خاموش ہو جانا ہے۔