سینیٹ الیکشن : کاغذات نامزدگی جمع کرانے کی تاریخ میں توسیع

تفصیلات کے مطابق   الیکشن کمیشن کی جانب سے سینیٹ الیکشن کیلئے  کاغذات نامزدگی جمع کرانے کی آخری تاریخ15فروری مقرر  کر دی گئی  ۔ ترجمان الیکشن کمیشن سہیل احمد کا کہنا ہے کہ کاغذات جمع کرنے والوں کے نام 16فروری کوشائع کئے جائیں گے ۔  سینیٹ کے انتخابات کیلئے پولنگ3مارچ کو ہی ہوگی۔   شیڈول میں تبدیلی امیدواروں کی سہولت کیلئے کی گئی ہے ۔ الیکشن کمیشن کے مطابق امیدواروں کی حتمی فہرست 24 فروری کو جاری ہوگی، امیدوار اپنے کاغذات نامزدگی 25 فروری تک واپس لے سکیں گے۔

اس سلسلے میں الیکشن کمیشن  کی جانب سے ریٹرننگ افسران تعینات کردیئے گئے، اسلام آباد کے لیے اسپیشل سیکریٹری الیکشن کمیشن سیکرٹریٹ ظفراقبال حسین ریٹرننگ افسر مقرر، ‏پنجاب  کے لیے صوبائی الیکشن کمشنر غلام اسرار خان ریٹرننگ افسر  ہوں گے۔ ‏سندھ کےلیے صوبائی الیکشن کمشنر اعجاز انور چوہان جبکہ ‏خیبرپختونخوا کے لیے صوبائی الیکشن کمشنر شریف اللہ ریٹرننگ افسر ہوں گے۔  ‏بلوچستان کے لیے صوبائی الیکشن کمشنر محمد رازق کو ریٹرننگ افسر  مقرر کیا گیا ہے۔

 الیکشن کمیشن کے مطابق چاروں صوبائی اسمبلیاں اور پارلیمنٹ ہاؤس کو پولنگ سٹیشن کا درجہ حاصل ہوگا۔ الیکشن کمیشن 48 نشستوں پر انتخابات کرائے گا،جن میں اسلام آباد کی2 ، پنجاب کی 11 ، سندھ  11 ، خیبر پختونخواہ سے 12 اور بلوچستان کی 12 نشستیں شامل  ہیں ۔

یاد رہے کہ گزشتہ سینیٹ کے الیکشن بھی 3 مارچ 2018 کو منعقد ہوئے تھے۔

واضح  رہے کہ وزیراعظم عمران خان نے سینیٹ کے الیکشن مقررہ وقت سے پہلے کروانے کا اعلان کیا تھا جسے اپوزیشن جماعتوں نے مسترد کر دیا تھا۔