ٹرمپ انتظامیہ کی جانب سے حاملہ خواتین کے لیے ٹائلی نال دوا غیر صحت بخش قرار

امریکی صدر ڈونلڈ ٹرمپ حاملہ خواتین کے لیے ٹائلی نال دوا کو غیر صحت بخش قرار دے د یا۔

ایک بیان میں صدر ٹرمپ نے کہا کہ فوڈ اینڈ ڈرگ ایڈمنسٹریشن ڈاکٹروں کو مشورہ دے گی کہ حاملہ عورتوں کو ٹائلی نال Tylenol دوائی دینے سے گریز کریں کیونکہ اس  سے نومولود کے آٹزم کا شکار ہونے کا خدشہ بڑھ جاتا ہے۔

صدر ٹرمپ کا کہنا تھا کہ ٹائلی نال اچھی دوائی نہیں ، اس لیے ایف ڈی اے سختی سے ہدایت کرے گی کہ اگرطبی ضرورت نہ ہو تو حاملہ خواتین اس کے استعمال کو محدود کریں۔

دوسری جانب امریکا کے وزیر صحت رابرٹ کینیڈی نے کہا کہ آگاہی کی خاطر اس دوائی پر سیفٹی لیبل بھی لگایا جائے گا۔

غیر ملکی خبر رساں ادارے کے مطابق  ٹائلی نال دوائی کو ایسیٹا مائنوفین acetaminophen بھی کہا جاتا ہے ، یہ دوائی عام طور پر بخار اور درد کے علاج کے طورپر لی جاتی ہے ۔

متعدد ڈاکٹروں اور آٹزم کی حمایت کرنے والی تنظیموں نے ٹرمپ انتظامیہ کے موقف کی مخالفت کی ہے۔ امریکی اوبسٹیٹریکس اینڈ گائناکالوجی کالج کے صدر ڈاکٹر اسٹیون جے فلیش مین نے ایک تحریری بیان میں کہا، ’یہ انتہائی پریشان کن ہے کہ ہمارے وفاقی صحت کے ادارے اس اعلان کو جاری کرنے کے لیے تیار ہیں جو لاکھوں افراد کی صحت اور بہبود پر اثر انداز ہو گا، اس کے باوجود ان کے پاس قابل اعتماد ڈیٹا کی حمایت نہیں ہے۔‘

اس کے علاوہ طبی ماہرین نے اس طرح کے بیانات کے نتیجے میں حاملہ خواتین میں بے جا خوف اور گناہ کے احساسات پیدا ہونے پر تشویش کا اظہار کیا ہے۔

ٹائلی نال نامی  دوائی پاکستان میں مختلف نام سے دستیاب ہے،  عام میڈیکل اسٹورز پر بغیر ڈاکٹر کے نسخے کے بھی یہ دوائی بڑی مقدار میں حاصل کی جاسکتی ہے۔

ایسیٹامنفین ایک درد کم کرنے والی اور بخار کی دوا ہے۔ یہ بخار کو کم کرتی ہے کیونکہ یہ جسم کو اضافی حرارت نکالنے میں مدد فراہم کرتی ہے۔

یہ عموماً معمولی درد اور تکلیف کے علاج کے لیے استعمال ہوتی ہے، جن میں سر درد، کمر درد، ہلکا آرتھرائٹس کا درد، دانت کا درد، پٹھوں کا درد، ماہواری سے قبل اور دوران کی تکلیف شامل ہیں۔