لاہور:نویں پاکستان بزنس ایکسپو کی شاندار افتتاحی تقریب،متعدد مقامی و عالمی کمپنیوں کی شرکت

لاہور: صوبائی وزیرپنجاب برائے مواصلات وتعمیرات، ملک صہیب احمد بھرتھ نے ہفتہ کے روز ’’نَویں پاکستان انڈسٹریل ایکسپو (PIE 2025)‘‘ کا افتتاح کیا۔ انہوں نے اس تقریب کو پاکستان اور چین کے درمیان دوستی کی ایک شاندار مثال قرار دیا۔

تفصیلات کے مطابق ایکسپو سینٹر لاہور میں منعقدہ اس تین روزہ نمائش میں پاکستان اور چین کی 200 سے زائد معروف کمپنیاں جدید ترین مشینری، اوزار اور صنعتی ٹیکنالوجی کی نمائش کر رہی ہیں۔

افتتاحی تقریب سے خطاب کرتے ہوئے صوبائی وزیر نے، جو محکمہ قانون کا اضافی قلمدان بھی رکھتے ہیں، کہا کہ ایسی نمائشیں صنعتی ترقی، روزگار کے مواقع پیدا کرنے اور معیشت کو مستحکم کرنے میں کلیدی کردار ادا کرتی ہیں۔

انہوں نے وزیراعلیٰ پنجاب محترمہ مریم نواز شریف کا پیغام بھی پہنچایا، جنہوں نے اس نمائش کے انعقاد کو سراہا اور چینی سرمایہ کاروں اور کاروباری اداروں کو ہر ممکن تعاون کی یقین دہانی کرائی۔ وزیر نے کہا کہ پاکستان کو ترقی کی راہ پر گامزن کرنے کے لیے ایسے اقدامات نہایت اہم ہیں۔

پاکستان انڈسٹریل ایکسپو 2025 کا مقصد لاہور کو بین الاقوامی صنعتی تعاون کے ایک نئے مرکز کے طور پر پیش کرنا ہے۔ مستقبل قریب میں اس نمائش کو سعودی عرب، کینیا اور جنوبی افریقہ میں بھی منعقد کرنے کا منصوبہ ہے تاکہ عالمی سطح پر صنعتی روابط کو فروغ دیا جا سکے۔

اس سال کی نمائش میں شرکت کرنے والی کمپنیاں جدید صنعتی شعبہ جات کی نمائندگی کر رہی ہیں جن میں سی این سی مشینری، آٹو پارٹس، ہارڈویئر اور ٹولز، زرعی مشینری اور صنعتی آلات و پرزہ جات شامل ہیں۔ یہ شعبے سرمایہ کاری، جدت اور ٹیکنالوجی کے تبادلے کے لیے اہم سمجھے جا رہے ہیں۔

افتتاحی تقریب میں چینی قونصل خانہ لاہور کے کمرشل وائس قونصل لی ہاؤٹینگ، کموڈور ڈاکٹر شفیق الرحمٰن، کموڈور مہتاب خان، ٹی ڈی اے پی کے افسران فیض احمد چھدڑ اور رافعہ سید، اور ایف پی سی سی آئی کے نائب صدر ذکی اعجاز نے شرکت کی۔ اس کے علاوہ وائس چانسلر یونیورسٹی آف سرگودھا ڈاکٹر قیصر عباس، ایوریسٹ انٹرنیشنل ایکسپو کے منیجنگ پارٹنر ارمغان مقیم، اور زیشان ہاشمی بھی موجود تھے۔

ایوریسٹ انٹرنیشنل ایکسپو کے سی ای او، فا وین یان، جو اس ایونٹ کے منتظم ہیں، نے اس موقع پر نمائش کے مقاصد پر روشنی ڈالی۔ انہوں نے کہا کہ "پاکستان انڈسٹریل ایکسپو" پاکستان کے صنعتی کیلنڈر میں ایک نمایاں مقام حاصل کر چکی ہے اور ہر سال صنعتوں کے مابین روابط، تجارتی سہولت اور ٹیکنالوجی کے تبادلے کے حوالے سے نمایاں کامیابیاں حاصل کر رہی ہے۔

ان کا مزید کہنا تھا کہ اس سال کا ایڈیشن سب سے مؤثر ثابت ہوگا، جو پاکستان اور چین کے درمیان دو طرفہ تعاون اور صنعتی جدت کے فروغ کے لیے ایک مؤثر پلیٹ فارم فراہم کرے گا۔

پاکستان انڈسٹریل ایکسپو 2025 آئندہ دو دنوں تک لاہور ایکسپو سینٹر میں جاری رہے گی اور صنعتی ماہرین، کاروباری افراد اور سرمایہ کاروں کے لیے کھلی رہے گی۔