بھارت: تمل اداکار و سیاستدان وجے کے جلسے میں بھگدڑ، 29 ہلاکتیں ، 50 افراد زخمی

بھارتی ریاست تمل ناڈو میں معروف اداکار اور نووارد سیاستدان تھلاپتی وجے کے سیاسی جلسے کے دوران شدید بھگدڑ کے نتیجے میں کم از کم 29 افراد ہلاک اور 50 سے زائد زخمی ہو گئے۔
بین الاقوامی خبر رساں ادارے ’رائٹرز‘ کے مطابق بھارتی اخبار دی ہندو نے ریاست کے وزیر صحت ایم اے سبرامنین کے حوالے سے ہلاکتوں کی تصدیق کی ہے۔ تاہم بعض دیگر بھارتی ذرائع، جیسے ٹائمز آف انڈیا، ہلاکتوں کی تعداد 10 بتا رہے ہیں، جس کے باعث اعداد و شمار میں تضاد پایا جا رہا ہے۔

واقعہ کے بعد قریبی اضلاع تروچی اور سیلم سے درجنوں ڈاکٹرز اور طبی عملہ متاثرہ مقام پر روانہ کیا گیا تاکہ زخمیوں کو فوری طبی امداد دی جا سکے۔
رپورٹ کے مطابق یہ واقعہ اس وقت پیش آیا جب وجے اسٹیج پر نمودار ہوئے اور ہزاروں مداحوں نے ان کی ایک جھلک دیکھنے کے لیے اسٹیج کی جانب ہجوم کر دیا، جس کے باعث افراتفری اور دھکم پیل شروع ہو گئی۔

واضح رہے کہ اس سے قبل رواں سال شمالی بھارت کے شہر ہری دوار میں بھی ایک مندر میں بھگدڑ کے نتیجے میں 6 افراد ہلاک ہو چکے ہیں، جس سے بھارت میں بڑے عوامی اجتماعات کی سکیورٹی اور ہجوم مینجمنٹ پر سنجیدہ سوالات اٹھ رہے ہیں۔
تمل ناڈو حکومت کی جانب سے متاثرین کے لواحقین کے لیے مالی امداد پر غور کیا جا رہا ہے جبکہ وجے کی سیاسی جماعت کی جانب سے بھی امدادی اقدامات کا اعلان متوقع ہے۔