افغانستان میں طالبان حکومت کی جانب سے ملک گیر انٹرنیٹ بندش

افغانستان میں طالبان حکومت نے ملک بھر میں انٹرنیٹ سروسز معطل کر دی ہیں، جس کے بعد شہری شدید مواصلاتی مسائل کا سامنا کر رہے ہیں۔

سائبر سیکیورٹی اور انٹرنیٹ کی نگرانی کرنے والی بین الاقوامی تنظیم نیٹ بلاکس کے مطابق افغانستان میں ٹیلی کمیونی کیشن سروسز تقریباً مکمل طور پر بند ہو چکی ہیں، اور موجودہ صورتحال "جان بوجھ کر کی جانے والی انٹرنیٹ معطلی" کے مترادف ہے۔ تنظیم کے مطابق، انٹرنیٹ کی دستیابی قومی سطح پر محض 14 فیصد رہ گئی ہے۔

خبررساں ایجنسی اے ایف پی کے کابل بیورو نے بھی تصدیق کی ہے کہ مقامی وقت کے مطابق شام 6 بج کر 15 منٹ پر دفتر کا تمام مواصلاتی رابطہ منقطع ہو گیا، جس میں موبائل نیٹ ورک بھی شامل تھا۔

اس سے قبل، طالبان حکومت نے رواں ماہ کے آغاز میں انٹرنیٹ پر جزوی پابندیوں کا آغاز کیا تھا۔ کئی علاقوں میں فائبر آپٹک انٹرنیٹ کنکشنز بند کر دیے گئے تھے۔ طالبان کے سپریم لیڈر ہیبت اللہ اخوندزادہ کے احکامات پر شمالی صوبے بلخ میں فائبر آپٹک نیٹ ورک مکمل طور پر منقطع کیا گیا۔

بلخ کے صوبائی ترجمان عطا اللہ زید نے 16 ستمبر کو ایک سوشل میڈیا پیغام میں بتایا تھا کہ یہ اقدام "برائی کے سدباب" کے لیے اٹھایا گیا ہے۔ ان کا کہنا تھا کہ اس کے متبادل انتظامات کیے جا رہے ہیں تاکہ بنیادی ضروریات متاثر نہ ہوں۔

افغانستان کے ایک مقامی ٹی وی چینل نے بھی سماجی رابطے کی ویب سائٹ ایکس (سابقہ ٹوئٹر) پر اطلاع دی کہ پیر کی دوپہر سے ملک بھر میں فائبر آپٹک انٹرنیٹ مکمل طور پر بند کر دیا گیا ہے۔