امریکا: غزہ میں جنگ ختم کرنے کے معاہدے کے بہت قریب ،ٹرمپ اور نیتن یاہو آج واشنگٹن میں ملاقات کریں گے

واشگٹن: امریکہ کا کہنا ہے کہ غزہ میں جنگ بندی کے ایک فریم ورک معاہدے کے حتمی ہونے کے قریب پہنچا جا رہا ہے اور اس معاملے پر امریکی صدر ڈونلڈ ٹرمپ آج وائٹ ہاؤس میں اسرائیلی وزیرِ اعظم بنیامین نیتن یاہو سے بات چیت کریں گے۔

عالمی خبر رساں ادارے رائٹرز کے حوالہ سے وائٹ ہاؤس کی پریس سیکریٹری کیرولائن لیوٹ نے کہا کہ اسرائیل اور حماس جنگ ختم کرنے اور مشرقِ وسطیٰ میں پائیدار امن کے قیام کے لیے ایک جامع فریم ورک کے قریب ہیں۔ لیوٹ نے بتایا کہ صدر ٹرمپ نیتن یاہو سے 21 نکاتی امن منصوبے پر بات کریں گے اور ساتھ ہی قطر کی قیادت سے بھی رابطہ رکھیں گے، جو حماس کے ساتھ ثالثی کا کردار ادا کر رہا ہے۔

انہوں نے کہا کہ دونوں فریقوں کو ایک منصفانہ معاہدے کے لیے کچھ نہ کچھ گنوانا پڑے گا؛ ممکن ہے کوئی فریق مکمل طور پر خوش نہ ہو، مگر یہی طریقہ کار اس تنازعے کا حل نکالنے کا راستہ ہے۔

برطانوی نشریاتی ادارے بی بی سی کے مطابق نیتن یاہو کی یہ ملاقات اقوامِ متحدہ میں ان کی حالیہ تقریر کے بعد ہو رہی ہے، جسے کئی ممالک اور سفارت کاروں نے بائیکاٹ کیا تھا۔ غزہ کی جنگ ختم کرنے کے حوالے سے بڑھے ہوئے عالمی دباؤ کے درمیان یہ وائٹ ہاؤس دورہ نیتن یاہو کا اس سال چوتھا دورہ ہے۔