شوہر کی گرفتاری کے بعد اداکارہ شلپاشیٹھی کا ردعمل سامنےآگیا

تفصیلات کے مطابق اداکارہ شلپا شیٹھی نے راج کندرا کی گرفتاری کے بعد سوشل میڈیا پلیٹ فارم انسٹاگرام پر پہلی بار ایک اسٹوری شیئر کی جس میں انہوں نے زندگی میں پیش آنے والی مشکلات اور ان سے ابھرنے کے بارے میں بات کی۔

شلپا شیٹھی نے انسٹا اسٹوری پر جیمز تھربرکا ایک قول شیئر کیا ’’غصے میں پیچھے کی جانب مت دیکھو یا خوف میں آگے کی جانب مت دیکھو لیکن اپنے آس پاس سے باخبر رہو۔‘‘

اداکارہ شلپا شیٹھی نے مزید لکھا میں گہری سانس لیتی ہوں یہ جان کر کہ میں خوش قسمت ہوں کہ زندہ ہوں۔ میں نے ماضی میں مشکلات کا سامنا کیا اور مستقبل میں بھی میں مشکلات کا سامنا کروں گی اور ان مشکلات سے ابھروں گی۔ مجھے آج اپنی زندگی جینے کے لیے کسی چیز سے غافل ہونے کی ضرورت نہیں۔

واضح رہے اداکارہ کے شوہر راج کندرا سمیت  11 لوگوں کو فحش فلمیں بنانے اور پھر موبائل ایپس پر پھیلانے کی وجہ سے گرفتار کیا ہے۔

 راج کندرا کے خلاف رواں سال فروری میں ممبئی کرائم برانچ کی جانب سے مقدمہ درج کیا گیا تھا جس کے تحت تمام تر شواہد اکٹھا کرنے کے بعد راج کندرا کو اس کیس میں بطور مرکزی ملزم گرفتار کیا گیا ہے ۔

یاد رہے کہ اس سے قبل اداکارہ و ماڈل پونم پانڈے نے ممبئی ہائیکورٹ میں راج کندرا سمیت ان کے ساتھی کے خلاف درخواست دائر کی تھی جس میں کہا گیا تھا کہ ایک معاہدہ ختم ہوجانے کے سبب ان کی ویڈیوز کو غیرقانونی طریقے سے استعمال کیا گیاہے۔