غزہ کی جانب ایک اور امدادی فلوٹیلا روانہ، اسرائیلی ناکہ بندی کو چیلنج

زہ کی ناکہ بندی ختم کرنے کی کوشش میں جانے والے ’گلوبل صمود فلوٹیلا‘ پر اسرائیلی قبضے کے بعد، ایک نئی امدادی فلوٹیلا غزہ کی سمت روانہ ہو گئی ہے۔

بین الاقوامی ادارہ فریڈم فلوٹیلا کولیشن (FFC) کے مطابق، 11 مزید کشتیاں اسرائیلی محاصرے کو چیلنج کرنے کے لیے غزہ کی طرف پیش قدمی کر رہی ہیں۔

تنظیم کے بیان کے مطابق، دو کشتیاں 25 ستمبر کو اٹلی کے شہر اوترانتو سے روانہ ہوئیں، جن کے ساتھ 30 ستمبر کو 'کونشینس' نامی جہاز بھی شامل ہو گیا، جس میں صحافی اور طبی عملہ سوار ہے۔

اعلامیے میں مزید کہا گیا کہ یہ جہاز کچھ گھنٹوں میں 8 کشتیوں کے قافلے 'تھاؤزنڈ میڈلینز ٹو غزہ' سے جا ملیں گے، اور یوں کل 11 کشتیوں پر مشتمل ایک نیا قافلہ غزہ کا رخ کرے گا۔

فریڈم فلوٹیلا کولیشن کا کہنا ہے کہ یہ قافلہ فی الحال کریٹ (Crete) کے ساحل کے قریب موجود ہے، اور اس میں تقریباً 100 افراد شریک ہیں۔

یہ تازہ قافلہ ایک ایسے وقت میں روانہ ہوا ہے جب اسرائیلی نیوی نے ’گلوبل صمود فلوٹیلا‘ کی آخری کشتی پر بھی دھاوا بول کر اسے اپنی تحویل میں لے لیا۔ اس کارروائی میں فلوٹیلا پر سوار 450 سے زائد امدادی کارکنوں کو بھی گرفتار کیا گیا۔

واضح رہے کہ اسرائیل گزشتہ 18 برس سے غزہ پر سخت ناکہ بندی عائد کیے ہوئے ہے، جسے مارچ میں سرحدی راستے مکمل بند کرکے خوراک و ادویات کی فراہمی روک کر مزید شدید کر دیا گیا۔

اکتوبر 2023 سے جاری اسرائیلی حملوں کے نتیجے میں اب تک 66 ہزار 200 سے زائد فلسطینی جاں بحق ہو چکے ہیں، جن میں خواتین اور بچوں کی بڑی تعداد شامل ہے۔