صدر ٹرمپ کی حماس کو ڈیڈ لائن، معاہدہ نہ ہوا تو سنگین نتائج کی دھمکی

امریکی صدر ڈونلڈ ٹرمپ نے فلسطینی مزاحمتی تنظیم حماس کو غزہ جنگ بندی معاہدے پر دستخط کے لیے اتوار کی شام 6 بجے تک کی مہلت دے دی ہے۔

ٹرمپ نے اپنے بیان میں کہا کہ "یہ حماس کے لیے آخری موقع ہے۔ اگر انہوں نے اس موقع کو گنوا دیا تو انہیں سخت نتائج کا سامنا کرنا پڑے گا۔"

انہوں نے مزید کہا کہ معاہدے پر دیگر عرب و مسلم ممالک پہلے ہی دستخط کر چکے ہیں اور اب حماس کے پاس فیصلہ کن وقت ہے۔
ٹرمپ نے خبردار کیا کہ "معاہدہ نہ کرنے کی صورت میں حماس کے جنگجوؤں کی جانیں بھی خطرے میں ہوں گی۔"

ساتھ ہی انہوں نے فلسطینی شہریوں کو مشورہ دیا کہ وہ غزہ شہر خالی کر کے محفوظ مقامات پر منتقل ہو جائیں۔

20 نکاتی جنگ بندی منصوبے پر اختلافات

امریکی صدر کی جانب سے جاری کردہ 20 نکاتی غزہ امن منصوبہ اس ہفتے اسرائیلی وزیراعظم کے ساتھ پریس کانفرنس میں پیش کیا گیا، جس پر بظاہر متعدد عرب ممالک نے اصولی اتفاق کیا ہے۔

تاہم قطر اور پاکستان نے منصوبے کے بعض نکات پر اعتراضات اور وضاحتوں کی ضرورت پر زور دیا ہے۔

قطر کے وزیراعظم شیخ محمد بن عبدالرحمان نے بیان میں کہا کہ "منصوبے کے کئی نکات پر مزید گفت و شنید کی ضرورت ہے، خاص طور پر اسرائیلی فوج کے غزہ سے انخلا سے متعلق۔"

اسی طرح پاکستان کے نائب وزیر اعظم اور وزیر خارجہ اسحاق ڈار نے قومی اسمبلی میں اظہارِ خیال کرتے ہوئے واضح کیا کہ "ٹرمپ کی جانب سے پیش کردہ 20 نکات وہ اصل مسودہ نہیں ہے جو مسلم ممالک کی مشاورت سے تیار کیا گیا تھا۔"

انہوں نے بتایا کہ "8 مسلم ممالک کی مشاورت سے جو ابتدائی ڈرافٹ پیش کیا گیا تھا، اس میں بعد ازاں تبدیلیاں کی گئیں اور اب جو نکات صدر ٹرمپ نے جاری کیے ہیں، وہ ہماری متفقہ تجاویز سے مختلف ہیں۔"

اسحاق ڈار کا کہنا تھا کہ پاکستان اپنے مسلم اتحادیوں کے ساتھ مل کر اصل متفقہ ڈرافٹ پر ہی فوکس رکھے گا۔