وزیر اعظم اور مولانا فضل الرحمان کا رابطہ، پاک سعودی دفاعی معاہدے پر تبادلہ خیال

وزیر اعظم شہباز شریف اور جے یو آئی (ف) کے سربراہ مولانا فضل الرحمان کے درمیان ٹیلی فون پر رابطہ ہوا، جس میں پاک سعودی دفاعی معاہدے پر تفصیلی تبادلہ خیال کیا گیا۔

جاری کردہ اعلامیے کے مطابق، مولانا فضل الرحمان نے اس دفاعی معاہدے کو ایک "تاریخی پیش رفت" قرار دیتے ہوئے اس کا خیرمقدم کیا۔ ان کا کہنا تھا کہ پاکستان کے لیے حرمین شریفین کی حفاظت کا شرف حاصل ہونا باعثِ سعادت ہے۔

اعلامیے میں مزید بتایا گیا کہ دونوں رہنماؤں نے مشرق وسطیٰ بالخصوص غزہ کی موجودہ صورتحال پر بھی تبادلہ خیال کیا۔ اس دوران غزہ میں پائیدار امن اور پاکستان کی جانب سے امن کی کوششوں کے کردار پر گفتگو ہوئی۔

دونوں رہنماؤں نے حماس کی جانب سے جنگ بندی کے بیان کو خطے میں قیامِ امن کی طرف ایک مثبت پیش رفت قرار دیا اور اسے فلسطینی عوام کے خلاف جاری نسل کشی کو روکنے کا ایک اہم موقع بھی گردانا۔

وزیر اعظم نے اس عزم کا اظہار کیا کہ پاکستان فلسطینیوں کے حقِ خود ارادیت کی حمایت جاری رکھے گا۔ ان کا کہنا تھا کہ جنگ بندی سے غزہ میں قتل عام کا سلسلہ رکے گا اور فلسطینی ریاست کے قیام کا خواب حقیقت میں بدل سکے گا۔

وزیر اعظم نے اس بات پر زور دیا کہ مشرق وسطیٰ میں پائیدار امن خطے کے عوام کی ترقی اور خوشحالی کے لیے ناگزیر ہے۔