پاکستان دشمنی میں بھارتی فوج جانوروں پر بھی ظلم کرنے لگی

بھارتی فوج کی جانب سے پاکستان مخالف رویے کا ایک اور افسوسناک مظاہرہ سامنے آیا ہے، جہاں سرحدی علاقے تھرپارکر کے گاؤں سنورانی میں معصوم جانوروں کو نشانہ بنایا گیا۔

مقامی اطلاعات کے مطابق، بھارتی فورسز نے تحصیل ڈاہلی کے سرحدی گاؤں سنورانی میں پاکستانی شہریوں کی بکریوں پر حملہ کیا، جس کے نتیجے میں 5 بکریاں ہلاک جبکہ 15 شدید زخمی ہو گئیں۔ سوشل میڈیا پر واقعے کی تصاویر بھی گردش کر رہی ہیں، جن میں زخمی مویشی صاف دکھائی دے رہے ہیں۔

سکیورٹی حکام کا کہنا ہے کہ عموماً ایسی صورتحال میں سرحد پار جانے والے مویشی واپس کر دیے جاتے ہیں، تاہم اس بار ان کے ساتھ تشدد آمیز سلوک روا رکھا گیا۔

متاثرہ مالکان کا دعویٰ ہے کہ زخمی بکریوں کی ٹانگیں تیز دھار آلات سے کاٹی گئیں، جس سے مویشیوں کو شدید تکلیف پہنچی ہے۔

یہ واقعہ نہ صرف سرحدی کشیدگی کو اجاگر کرتا ہے بلکہ انسانی ہمدردی کے تقاضوں کے برعکس بھارتی فورسز کے رویے پر بھی سوالیہ نشان بن گیا ہے۔