آئی سی سی ویمنز ورلڈ کپ : بھارت کا پاکستان کو جیت کیلئے 248 رنز کا ہدف

کولمبو: آئی سی سی ویمنز کرکٹ ورلڈ کپ کےچھٹے میچ میں بھارت نے پاکستان کو جیت کے لیے 248 رنز کا ہدف دے دیا۔

تفصیلات کے مطابق کولمبو کے پریما داسا اسٹیڈیم میں پاکستان ویمن ٹیم کی کپتان فاطمہ ثنا نے ٹاس جیت کر بھارت کو بیٹنگ کی دعوت دی۔ بھارت کی پوری ٹیم مقررہ اوور میں 247 رنز بنا کر آؤٹ ہو گئی۔

بھارت کی طرف سے پرتیکا راول نے 31 ، سمرتی مندھانا نے 23 جبکہ ہارلین دیول 46 رنز کے ساتھ نمایاں رہیں۔
 کپتان ہرمن پریت کور 19، جمیما روڈریگز 32، دیپتی شرما 25، سنہ رانا 20 اور وکٹ کیپر بلے باز رچا گھوش نے 35 رنز بنائے۔ؤ

جبکہ پاکستان کی طرف سے ڈیانا بیگ 4، سعدیہ اقبال اور فاطمہ ثناء 2، 2 جبکہ رامین شمیم اور نشرا سندھو نے ایک ایک وکٹ حاصل کی۔

اس سے قبل ویمنز ورلڈ کپ میں بھی بھارت نے اپنی ہٹ دھرمی برقرار رکھتے ہوئے کھیل کی روح کے منافی اقدامات جاری رکھے، ایشیا کپ کے ٹاس کے دوران بھارتی ٹیم کی کپتان نے پاکستانی کپتان فاطمہ ثنا سے مصافحہ نہیں کیا۔

واضح رہے ویمنز کرکٹ ورلڈ کپ میں آج پاک بھارت میچ بارش سے متاثر ہونے کا امکان ہے، میچ کے آغاز سے قبل بارش کی پیش گوئی کی گئی ہے،جبکہ کولمبو میں گزشتہ روز بھی مسلسل بارش کا سلسلہ جاری رہا تھا جس کے باعث سری لنکا اور آسٹریلیا کے درمیان میچ ختم کر دیا گیا تھا۔