پی سی بی نے26-2025کے سیزن کے لیے میچ آفیشلز کے نئے پینل کا اعلان کر دیا

پاکستان کرکٹ بورڈ (پی سی بی) نے 2025 اور 2026 کے سیزن کے لیے میچ آفیشلز کے نئے پینل کا اعلان کر دیا ہے، جس میں مردوں کے ساتھ ساتھ خواتین امپائرز کو بھی نمایاں نمائندگی دی گئی ہے۔

پی سی بی کے مطابق انٹرنیشنل میچ آفیشلز پینل میں علی نقوی واحد میچ ریفری کے طور پر شامل کیے گئے ہیں جبکہ امپائرز کے شعبے میں آصف یعقوب، فیصل آفریدی، راشد ریاض اور سلیمہ امتیاز کو شامل کیا گیا ہے۔

PCB announces match officials' panel for 2025-26 season

Details here ⤵️ https://t.co/zEXH947tgp

— PCB Media (@TheRealPCBMedia) October 7, 2025

سلیمہ امتیاز کی شمولیت پاکستانی کرکٹ میں خواتین کی شراکت کو اجاگر کرنے کے لیے مثبت قدم قرار دیا جا رہا ہے۔

پی سی بی کے ایلیٹ پینل میں مجموعی طور پر 18 امپائرز اور 10 میچ ریفریز شامل ہیں، جو ملک بھر میں ڈومیسٹک اور دیگر اہم میچز میں آفیشیٹنگ کے فرائض انجام دیں گے۔

امپائرز کی کارکردگی کو مزید بہتر بنانے اور باصلاحیت آفیشلز کو آگے لانے کے لیے سپلیمنٹری پینل کو دو حصوں میں تقسیم کیا گیا ہے۔ سپلیمنٹری پینل 1 میں 14 جبکہ سپلیمنٹری پینل 2 میں 24 امپائرز شامل کیے گئے ہیں۔ اسی طرح میچ ریفریز کے سپلیمنٹری پینل میں 10 افراد شامل ہیں۔

پی سی بی نے ایمرجنگ پینل بھی تشکیل دیا ہے جس میں پاکستان بھر سے 40 امپائرز کو منتخب کیا گیا ہے تاکہ نئے ٹیلنٹ کو تربیت دے کر مستقبل کے لیے تیار کیا جا سکے۔

پی سی بی کے مطابق مجموعی میچ آفیشلز پینل میں سلیمہ امتیاز سمیت 13 خواتین امپائرز کو شامل کیا گیا ہے، جو ملکی کرکٹ میں خواتین کی بڑھتی ہوئی شرکت کا مظہر ہے۔