تحریک انصاف کی خاتون رہنما صنم جاوید کے مبینہ اغوا کا مقدمہ پشاور کے تھانہ شرقی میں درج

پشاور: تحریک انصاف کی خاتون رہنما صنم جاوید کے مبینہ اغوا کا مقدمہ درج کرلیا گیا۔

صنم جاوید کو انسداد دہشت گردی عدالت نے 9 مئی کے مقدمہ میں 5 سال قید کی سزا سنا رکھی ہے جس کے بعد وہ گرفتاری اور اس کے بعد سزا سے بچنے کے لیے ممبینہ طور پر خیبر پختونخوا میں روپوش ہو گئی تھیں۔

ایف آئی آر ایڈووکیٹ حرا بابر کی مدعیت میں درج کی گئی ہے جس میں ان کا کہنا ہے کہ وہ 6 اکتوبر کی شب اپنی قریبی دوست صنم جاوید خان کے ہمراہ پشاور میں موجود تھیں۔ دونوں نے ‘آرٹسین پلیٹ کیفے ‘میں کھانا کھایا اور اس کے بعد پشاور کینٹ کی جانب روانگی اختیار کی۔

ایف آئی آر کے مطابق رات 10 بج کر 40 منٹ پر جب وہ سول آفیسرز کالونی کے قریب پہنچیں تو سبز رنگ کے ایک ویگو ڈالے نے ان کی گاڑی کو روکنے کی کوشش کی۔

گاڑی واپس موڑنے کی کوشش پر ایک سفید کار نے پیچھے سے ان کا راستہ بند کر دیا۔ دونوں گاڑیوں سے مجموعی طور پر پانچ افراد نکلے، جنہوں نے زبردستی صنم جاوید خان کو اپنی گاڑی میں بٹھایا اور روانہ ہو گئے۔

ایڈووکیٹ حرا کے مطابق انہوں نے مدد کے لیے پکارا، وہاں سکیورٹی اہلکار اور دیگر افسران بھی موجود تھے مگر کسی نے ہماری مدد نہیں کی، اور وہ افراد صنم جاوید کو لے کر فرار ہو گئے۔

ایڈووکیٹ حرا نے واقعے کو سنگین نوعیت کا قرار دیتے ہوئے متعلقہ حکام سے فوری اور شفاف تحقیقات، ملوث افراد کی گرفتاری اور صنم جاوید خان کی جان و مال کے تحفظ کو یقینی بنانے کا مطالبہ کیا ہے۔

یاد رہے کہ گزشتہ روز صنم جاوید کی گرفتاری کی خبریں منظر عام پر آئی تھیں جبکہ اس سے قبل ان کی بہن فلک جاوید کو حراست میں لیا گیا تھا جن کے بعد عدالت نے ان کا 4 روزہ جسمانی ریمانڈ منظور کیا تھا۔