ویمنز ورلڈ کپ: نیوزی لینڈ کی شاندار واپسی، بنگلہ دیش کو 100 رنز سے شکست

ویمنز ورلڈ کپ 2025 کے گیارھویں میچ میں نیوزی لینڈ نے بنگلہ دیش کو 100 رنز سے شکست دے کر ایونٹ میں اپنی پہلی فتح حاصل کر لی۔

یہ میچ گوہاٹی میں کھیلا گیا، جہاں بنگلہ دیش کی ٹیم 228 رنز کے ہدف کے تعاقب میں صرف 127 رنز پر ڈھیر ہو گئی۔ ٹاپ آرڈر مکمل طور پر ناکام رہا اور ابتدائی پانچ بیٹرز ڈبل فیگر میں بھی داخل نہ ہو سکیں، جس کے باعث ٹیم پر مسلسل دباؤ بڑھتا گیا۔ بنگلہ دیشی ٹیم 40ویں اوور میں مکمل طور پر آل آؤٹ ہو گئی۔

فہیمہ خاتون 34 اور رابعہ خان 25 رنز کے ساتھ بنگلہ دیش کی جانب سے نمایاں بیٹرز رہیں۔

نیوزی لینڈ کی جانب سے لیا تاہوہو اور جیس کیر نے 3،3 کھلاڑیوں کو آؤٹ کیا، جبکہ روزمیری مائیر نے 2 وکٹیں حاصل کیں۔

اس سے قبل، نیوزی لینڈ نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 227 رنز بنائے۔

بروک ہالیڈے 69 اور صوفیہ ڈیوائن 63 رنز کے ساتھ نمایاں اسکورر رہیں۔ سوزی بیٹس نے 29 اور میڈی گرین نے 25 رنز کی اننگز کھیلی۔

بنگلہ دیش کی جانب سے رابعہ خان نے شاندار باؤلنگ کرتے ہوئے 30 رنز کے عوض 3 وکٹیں حاصل کیں۔