ٹیرف وار: ٹرمپ نے چین پر 100 فیصد اضافی ٹیرف عائد کر دیا

واشنگٹن ڈی سی: ڈونلڈ ٹرمپ کے اقتدار میں آنے کے بعد امریکہ کی جانب سے دنیا کے مختلف ممالک پر ٹیرف عائد کرنے کا سلسلہ جاری ہے حا ل ہی میں امریکی صدر نے چین پر عائد محصولات میں اضافی 100 فیصد ٹیرف لگانے کا اعلان کر دیا۔

تفصیلات کے مطابق امریکی صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر چین پر 100 فیصد نیا ٹیرف عائد کرنے کا اعلان کیا۔

ٹرمپ نے کہا کہ امریکا نومبر سے چینی درآمدات پر اضافی 100 فیصد ٹیرف عائد کرے گا، امریکی مصنوعات کے تحفظ کے لیے سخت تجارتی اقدامات کیے جائیں گے۔

بیان میں ٹرمپ نےمزید کہا کہ چین سے درآمدات پر سو فیصد ٹیرف کا نفاذ نومبر یا اس سے بھی پہلے ہوگا، ان کا کہنا تھا کہ چین نے تجارت پر انتہائی جارحانہ مؤقف اختیار کیا ہے۔

امریکی صدر کا کہنا تھا کہ چین نے یکم نومبر سے تقریباً ہر چیز پر برآمدی پابندیوں کاخط بھیجا ہے، چین پراضافی 100 فیصد ٹیرف، تمام اہم سافٹ ویئرز پر برآمدی کنٹرول نافذ کریں گے، ان کا مزید کہنا تھا کہ یقین کرنا مشکل ہے کہ چین ایسا قدم اٹھا سکتا ہے لیکن اس نے اٹھا لیا ہے،ان کا کہنا تھا کہ چینی صدر شی جن پنگ سے ملاقات منسوخ نہیں کی۔

بیان میں امریکی صدر ٹرمپ نے مزید کہا  کہ مشرق وسطیٰ کے دورے کے دوران مصر جائیں گے، اسرائیلی پارلیمنٹ سے خطاب بھی کریں گے، صدر ٹرمپ نے کہا کہ یرغمالیوں کی واپسی پیر سے شروع ہوگی۔