سمندری کیبل کی مرمت کے پیش نظرآج ملک بھر میں انٹرنیٹ سروس متاثر ہونے کا خدشہ

اسلام آباد: سمندری کیبل کی مرمت کے باعث آج ملک بھر میں انٹرنیٹ سروس متاثر ہونے کا خدشہ ہے۔

اس حوالے سے ترجمان پاکستان ٹیلی کمیونی کیشن کمپنی لمیٹڈ(پی ٹی سی ایل) کا کہنا ہے کہ مرمت کا کام صبح گیارہ بجے شروع ہو گا اور یہ عمل تقریباً اٹھارہ گھنٹے تک جاری رہ سکتا ہے۔ 

ترجمان کے مطابق مرمت کے کام کے سبب انٹرنیٹ سروس میں سست روی یا جزوی تعطل کا سامنا ہو سکتا ہے۔

پی ٹی سی ایل حکام نےمزید کہا ہے کہ کمپنی کی ایک زیرِ سمندر کیبل میں موجود خرابی کو دور کرنے کے لیے مرمت کے کام کی منصوبہ بندی کی گئی ہے، جو بین الاقوامی کیبل کنسورشیم کے تحت انجام دی جائے گی۔

بیان میں کہا گیا ہے کہ یہ سرگرمی آج 14 اکتوبر کو صبح 11 بجے کے قریب شروع ہو گی ، اس دوران صارفین کو انٹرنیٹ کی رفتار میں کمی کا سامنا ہو سکتا ہے، تاہم یہ واضح نہیں کیا گیا کہ کس زیرِ سمندر کیبل سسٹم پر کام کیا جا رہا ہے۔

حکام نے یقین دہانی کرائی ہے کہ کام مکمل ہوتے ہی انٹرنیٹ سروس مکمل بحال کر دی جائے گی اور صارفین کو دوبارہ بہتر رفتار فراہم کی جائے گی۔