وزیراعظم کی زیر صدارت افغان مہاجرین پر اجلاس، وزیراعلیٰ کے پی غیر حاضر

وزیرِاعظم شہباز شریف کی زیر صدارت افغان مہاجرین سے متعلق ایک اہم اجلاس منعقد ہوا، جس میں ملک کے تین صوبوں کے وزرائے اعلیٰ، وزیراعظم آزاد کشمیر اور گلگت بلتستان کے سربراہ نے شرکت کی، تاہم خیبرپختونخوا کے وزیر اعلیٰ سہیل آفریدی اجلاس میں شریک نہ ہوئے۔

خیبرپختونخوا کی نمائندگی ان کے مشیر مزمل اسلم نے کی، جو اجلاس میں صوبے کا مؤقف پیش کرتے رہے۔

اجلاس کے دوران افغان مہاجرین کی موجودہ صورتحال، ان کی واپسی سے متعلق پالیسیوں، اور افغانستان کی جانب سے دراندازی و اشتعال انگیزی جیسے معاملات پر تبادلہ خیال کیا گیا۔

وفاقی وزیر اطلاعات عطا تارڑ نے وزیراعلیٰ خیبرپختونخوا کی غیر حاضری پر افسوس کا اظہار کرتے ہوئے کہا کہ
"تمام متعلقہ صوبوں اور اداروں نے اجلاس میں شرکت کی، مگر سہیل آفریدی، جو اسلام آباد میں موجود تھے، خود اجلاس میں شریک نہ ہوئے۔"

عطا تارڑ نے اجلاس میں سہیل آفریدی کی عدم موجودگی کو غیر سنجیدہ رویہ قرار دیتے ہوئے کہا کہ ایسے اہم قومی معاملات میں منتخب نمائندوں کی براہ راست شرکت لازمی ہے۔