آذربائیجان کا پاکستان میں بین‌الپارلیمانی اسپیکرز کانفرنس میں شرکت کا اعلان

آذربائیجان نے اسلام آباد میں آئندہ ماہ ہونے والی بین‌الپارلیمانی اسپیکرز کانفرنس میں شرکت کی باضابطہ منظوری دے دی ہے۔

سینیٹ سیکریٹریٹ کے مطابق چیئرمین سینیٹ سید یوسف رضا گیلانی نے آذربائیجان کے آئین کی منظوری کی 30ویں سالگرہ کے موقع پر باکو میں منعقدہ بین‌الاقوامی پارلیمانی کانفرنس کے دوران آذربائیجان کی اسپیکر صاحبا غفاروا سے دوطرفہ ملاقات کی۔

اعلامیے میں کہا گیا کہ چیئرمین سینیٹ نے پاکستان اور آذربائیجان کے درمیان دیرینہ برادرانہ تعلقات کو سراہا اور کہا کہ امن، سلامتی اور خوشحالی دونوں ممالک کا مشترکہ مشن ہے۔

یوسف رضا گیلانی نے آذربائیجان کی قیادت کو 10 تا 12 نومبر 2025 کو اسلام آباد میں ہونے والی “انٹر پارلیمنٹری اسپیکرز کانفرنس” میں شرکت کی دعوت دی۔ ان کا کہنا تھا کہ یہ کانفرنس علاقائی امن، ترقی اور بین‌الپارلیمانی تعاون کے فروغ کے لیے ایک اہم فورم ثابت ہوگی۔

اسپیکر صاحبا غفاروا نے چیئرمین سینیٹ کی دعوت قبول کرتے ہوئے کہا کہ ایک ماہ کے دوران دونوں رہنماؤں کی دوسری ملاقات دوطرفہ تعلقات کے فروغ کی علامت ہے۔

انہوں نے پاکستان میں میزبانی پر شکریہ ادا کیا اور کہا کہ آرمینیا کے ساتھ جاری امن و ترقیاتی اقدامات سے دونوں ممالک کے درمیان تعاون کے نئے مواقع پیدا ہوں گے۔

ملاقات میں دونوں رہنماؤں نے پارلیمانی وفود کے تبادلوں، مشترکہ ترقیاتی منصوبوں اور عوامی روابط کو مزید مضبوط بنانے کے عزم کا اعادہ کیا۔