24 سرکاری ادارے نجکاری کے لیے مختص ، پی آئی اے کی نجکاری رواں سال مکمل ہوجائے گی،وزیر خزانہ

اسلام آباد: وفاقی وزیر خزانہ محمد اورنگزیب کا کہنا ہے کہ حکومت نے 24 سرکاری ادارے نجکاری کے لیے مختص کر دیے ہیں، جبکہ قومی ائیر لائن پی آئی اے کی نجکاری رواں سال مکمل ہوجائے گی۔

تفصیلات کے مطابق کراچی میں فیوچر سمٹ سے خطاب کرتے ہوئے وفاقی وزیر خزانہ محمد اورنگزیب نے اعلان کیا کہ پاکستان اور آئی ایم ایف کے درمیان دوسرے جائزے پر اسٹاف لیول ایگریمنٹ طے پا گیا ہے، آئی ایم ایف بورڈ کا اجلاس دسمبر کے آغاز میں ہوگا، جس میں قسط کی ادائیگی کی منظوری دی جائے گی۔

سیمنار سے خطاب کرتے ہوئے وفاقی وزیر خزانہ نے کہا کہ پاکستان کی معیشت درست سمت میں گامزن ہے اور سرمایہ کاروں کا اعتماد مسلسل بڑھ رہا ہے۔

ان کا مزید کہنا تھا کہ وفاقی حکومت نے 24 سرکاری ادارے نجکاری کے لیے مختص کر دیے ہیں، جن میں پی آئی اے کی نجکاری رواں سال مکمل ہوجائے گی۔

وفاقی وزیر خزانہ کا کہنا تھا کہ ٹیکس نیٹ میں نمایاں اضافہ ہوا ہے اور اس سال 9 لاکھ نئے فائلرز شامل ہوئے ہیں جبکہ مصر نے ایف بی آر اصلاحات کے حوالے سے پاکستان کے تجربات سے سیکھنے کی خواہش ظاہر کی ہے۔

انہوں نے کہا کہ پاکستان کو برآمدات کا مرکز بنانا حکومت کا ہدف ہے اور سفارتی تعلقات کو سرمایہ کاری کے فروغ کے لیے استعمال کیا جائے گا۔ ان کے مطابق بلیو اکانومی میں ترقی کے بے پناہ مواقع موجود ہیں جنہیں استعمال میں لا کر ملکی معیشت کو مستحکم بنایا جا سکتا ہے۔