کیڈٹ کالج وانا پر دہشتگرد وں کا بزدلانہ حملہ، فورسز نے تمام افراد کوبحفاظت ریسکیو کرلیا

وانا: سیکیورٹی ذرائع کا کہنا ہے کہ کیڈٹ کالج میں موجود تمام طلبہ اور اساتذہ کو ریسکیو کرلیا گیا ہے۔

سیکیورٹی ذرائع کے مطابق کالج میں حملے کے وقت قریباً 650 افراد موجود تھے جن میں 525 کیڈٹس شامل تھے، اور فورسز نے انتہائی احتیاط اورحکمتِ عملی کے ساتھ تمام طلبہ اور اساتذہ کو بحفاظت ریسکیو کر لیا۔

ویڈیوز میں دیکھا جا سکتا ہے کہ سیکیورٹی اہلکار بچوں کو اٹھا کر، چوکنا انداز میں کالج عمارات سے باہر نکال رہے ہیں اور طبی عملہ موقع پر پہنچ کر فوری امدادی چیک کر رہا ہے۔

سیکیورٹی ذرائع نے بتایا کہ کالج میں افغان خوارج کی موجودگی کی شکایت کی بنیاد پر آپریشن بروقت اور محتاط انداز میں چلایا گیا، تاکہ کیڈٹس کی جانوں کو ہرصورت میں تحفظ فراہم کیا جا سکے۔

سیکیورٹی ذرائع نے مزید بتایا کہ افغان خوارج کی کالج میں موجودگی اور کیڈٹس کی جانوں کی حفاظت کے پیش نظر آپریشن احتیاط سے کیا گیا۔

واضح رہے کہ ایک روز قبل افغان خوارج نے وانا کیڈٹ کالج کے مرکزی دروازے پر بارود سے بھری گاڑی دے ماری تھی، جس کے نتیجے میں زوردار دھماکا ہوا، دھماکے سے کالج کا مرکزی گیٹ مکمل طور پر تباہ ہوگیا جبکہ قریبی عمارتوں کو بھی شدید نقصان پہنچا۔

سیکیورٹی ذرائع کے مطابق وانا کیڈٹ کالج پر حملہ کرنے والے خوارج کا تعلق افغانستان سے بتایا گیا ہے اور حملہ آور وہاں سے ٹیلیفون کے ذریعے ہدایات حاصل کر رہے تھے۔

سیکیورٹی ذرائع نے واضح کیا کہ آپریشن جامع اور منظم طریقے سے جاری ہے اور بچوں، اساتذہ اور عملے کی حفاظت اولین ترجیح ہے۔

اس موقع پر کیڈٹس اور اساتذہ کا حوصلہ بلند بتا یا جاتا ہے اور فورسز کی پیشہ ورانہ کارروائی کو سراہا جا رہا ہے۔ مزید تفصیلات اور باضابطہ بریفنگ سکیورٹی حکام کی جانب سے جاری کی جائے گی۔