اسلام آباد خودکش حملے کی ابتدائی رپورٹ آ گئی، حملہ آور کا تعلق کس شہر سے تھا؟

اسلام آباد: وفاقی تحقیقاتی اداروں نے اسلام آبادمیں ہونے والی خودکش حملے کی ابتدائی رپورٹ تیار کرلی ہے جس میں واقعے سے متعلق اہم انکشافات سامنے آئے ہیں۔

رپورٹ میں بتایا گیا ہے کہ خودکش حملہ آورکا تعلق خیبرپختونخوا کے ضلع باجوڑ سے تھا اور وہ کچھ عرصے سے وہاں ہی رہائش پذیرتھا۔

ابتدائی رپورٹ کے مطابق حملہ آورجمعہ کے روزاسلام آباد پہنچا، جہاں اس نے پیرودھائی کے علاقے میں قیام کیا، حملہ آورنے پیرودھائی سے موٹرسائیکل نمبر BCB-2564 پرجی الیون کچہری کا رخ کیا۔

تحقیقات میں مزید بتایا گیا ہے کہ حملہ آورنے خود کو چادرسے ڈھانپ رکھا تھا تاکہ شناخت سے بچ سکے رپورٹ میں یہ بھی کہا گیا ہے کہ حملہ آورنے جی الیون کچہری کے داخلی راستے کے قریب خود کو دھماکے سے اڑا لیا، جس کے نتیجے میں جانی ومالی نقصان ہوا۔

تحقیقاتی اداروں نے جائے وقوعہ سے شواہد اکٹھے کرلیے ہیں جبکہ موٹرسائیکل کے رجسٹریشن ریکارڈ اوررابطوں کے سراغ کیلئے جدید فورنزک طریقہ کاراختیار کیا جا رہا ہے، حتمی رپورٹ متعلقہ اداروں کوجلد پیش کی جائے گی۔

دوسری جانب آئی جی اسلام آباد کا کہنا ہے کہ دھماکے میں 8 کلو گرام تک بارودی مواد اور بال بیرنگز استعمال کیے گئے ، ابھی تک جو شواہد اکٹھے کیے گئے اس کے مطابق حملہ آور ایک ہی تھا۔

آئی جی اسلام آباد نے بتایا کہ  ایک موٹر سائیکل اور گاڑی کو مشکوک تصور کیا جا رہا ہے، کیمروں کی بیک ٹریکنگ سے شواہد اکٹھے کیے جا رہے ہیں،  فارنزک، سی ٹی ڈی، انویسٹی گیشن، سیف سٹی اور حساس ادارے شواہد کا جائزہ لے رہے ہیں۔

یاد رہے کہ اس خودکش دھماکے میں 12 افراد شہید جبکہ 27 کے قریب زخمی ہوئے تھے۔ سیکیورٹی ذرائع کے مطابق ابتدائی تحقیقات میں یہ بات سامنے آئی ہے کہ حملہ بھارتی اسپانسرڈ افغان طالبان کی پراکسی تنظیم “فتنہ الخوارج” کی کارروائی تھی۔