پاکستان کو افغان بحران کاذمہ دار ٹھہرانا افسوس ناک ہے : وزیراعظم

تفصیلات کے مطابق وزیر اعظم عمران خان نے افغان یوتھ فورم کے ایک وفد سے گفتگو کرتے ہوئے کہا کہ  پاکستان دنیا میں کسی بھی دوسرے ملک سے زیادہ افغانستان میں امن چاہتا ہے، افغانستان میں امن سے پاکستان کو وسط ایشیائی ریاستوں تک رسائی حاصل ہوگی۔ انہوں نے کہاکہ  پاکستان کی مستقبل کی تمام اقتصادی پالیسیوں کا انحصار افغانستان میں امن پر ہے ،پاکستانی عوام افغانستان کے عوام کو اپنا بھائی سمجھتے ہیں۔ افغانستان میں امن کی اشد ضرورت ہے، افغان حکومت اور طالبان کے درمیان خانہ جنگی کے اثرات پاکستان کے قبائلی علاقوں میں ظاہر ہوں گے۔

انہوں نے مختلف سوالات کا جواب دیتے ہوئے کہا کہ  کہاکہ پاکستان اُس وقت تک بھارت کے ساتھ مذاکرات کرے گا نہ افغان امن عمل میں بھارت کی شراکت تسلیم کرے گا جب تک وہ پانچ اگست 2019کا اقدام واپس نہیں لے لیتا اور مقبوضہ کشمیر کی حیثیت بحال نہیں کی جاتی جس کے مطابق کشمیریوں کو اقوام متحدہ کی قراردادوں کے تحت حق خودارادیت دیا گیا ہے۔

وزیراعظم عمران خان  نے کہاکہ بد قسمتی سے افغانستان میں یہ غلط فہمی موجود ہے کہ پاکستان کو عسکری ادارے کنٹرول کرتے ہیں ، اِس کی بنیاد بھارتی پروپیگنڈا ہے۔انہوں نے کہا کہ پاکستان نے ہمیشہ بھارت کے ساتھ امن کی خواہش کا اظہار کیا ہے لیکن بھارت امن نہیں چاہتا کیونکہ وہ اِس وقت آر ایس ایس  کے نظریے پر عمل پیرا ہے۔

انہوں نے مزید کہاکہ افغانستان کو باہر سے نہیں چلایا جا سکتا، میرا ہمیشہ مؤقف رہا ہے کہ افغان مسئلے کا حل عسکری نہیں بلکہ سیاسی طریقے سے ہے، حکومت کو اس مؤقف پر عسکری اداروں کی مکمل حمایت حاصل ہے۔ حال ہی میں افغانستان کا دورہ کیا، صدر اشرف غنی سے اچھے تعلقات ہیں۔

وزیر اعظم نےمزید  کہا کہ افغانستان میں امن کے حوالے سے خطے کا کوئی اور ملک پاکستان کی کوششوں کی برابری کا دعوے دار نہیں ہو سکتا۔ان کا کہنا ہے کہ ازبکستان کے ساتھ مزار شریف پشاور ریلوے لائن کے لیے معاہدہ کر چکے ہیں، ملکوں کے تعلقات میں اتار چڑھاؤ آتا رہتا ہے۔