بنگلہ دیش : شادی کی خوشیاں ماتم میں بدل گئیں ، آسمانی بجلی گرنے سے 17 افراد ہلاک

بنگلہ دیشی حکام کے مطابق یہ  افسوس ناک واقعہ بدھ کے روز پیش آیا  جب شادی کی خوشیاں ماتم میں بدل گئیں ،  شادی کی تقریب میں شرکت کرنےکیلئے جانیوالی کشتی پر آسمانی بجلی گر گئی ۔ قصبے کے ایک سرکاری منتظم  کے مطابق دولہا اور اس میں سوار دیگر افراد دلہن کے گھر جا رہے تھے جب د ریائے پدما کے کنارے پر پہنچتے ہی آسمانی بجلی کشتی  پر آگری ۔

آسمانی بجلی گرنے کے اس واقعے میں  زخمی ہونے والوں  میں دولہا بھی شامل تھا  ، تاہم خوش قسمتی سے  دلہن کشتی پر سوار نہیں تھی ۔کشتی میں سوار افراد نے جان بچانے کیلئے شیب گنج کے ندی کنارے قصبے میں  پناہ لی ۔

جنوبی ایشیائی ملک میں ہر سال آسمانی بجلی گرنے سے سینکڑوں افراد ہلاک ہوتے ہیں ، جن میں زیادہ تر کسان اپنے کھیتوں میں  جان سے ہاتھ دھو بیٹھتے ہیں ۔سرکاری اعداد و شمار کے مطابق بنگلہ دیش میں  2016 میں آسمانی بجلی سے 200 سے زائد اموات ہوئیں ،جبکہ مئی میں ایک ہی دن میں  82 افراد ہلاک ہوچکے ہیں ، حکومت نے 2016 میں آسمانی بجلی کو قدرتی آفت قرار دیا تھا ۔

سرکاری رپورٹس کے مطابق ، بنگلہ دیش میں آسمانی  بجلی گرنے کے واقعات میں  زیادہ تر اموات مارچ اور جولائی کے درمیان ہوتی ہیں۔ ماہرین کا کہنا ہے کہ خطرناک  آسمانی بجلی کے گرنے  میں اضافے کا تعلق جنگلات کی کٹائی سے ہے ۔ بنگلہ دیش میں  موسمیاتی تبدیلی کے اثرات کو کم کرنے اور آسمانی بجلی سے ہونے والی اموات کی تعداد کو کم کرنے کے لیے لاکھوں کھجور کے درخت لگائے ہیں۔دریں اثنا ، بدترین فضائی آلودگی اور گلوبل وارمنگ بھی بنگلہ دیش میں آسمانی بجلی گرنے کی فریکوئنسی میں اضافے  کاباعث بن رہی ہے ۔