تاجروں اور عوام کے لیے لاک ڈاؤن وزراء اور جیالے موج میں : حلیم عادل شیخ

تفصیلات کے مطابق صوبائی وزیر ساجد جوکھیو کی جانب سے وزیر بننے کی خوشی میں ایک تقریب کا انعقاد کیا گیا ہے جس میں کورونا ایس او پیز کو نظراندازکیا گیا ہے،تقریب گلشن حدید کے ایک شادی ہال میں رکھی گئی،پولیس کارروائی کی بجاء پروگرام کی سیکیورٹی پر معمور ہے جبکہ مقامی ایس ایچ او خود تقریب میں بحیثیت مہمان شریک ہوئے ہیں ۔

اس صورتحال پر اپوزیشن لیڈر سندھ اسمبلی حلیم عادل شیخ کا کہنا ہے کہ سندھ حکومت کا لاک ڈاؤن صرف تاجروں اور غریبوں کے لیے ہے، سندھ حکومت کے وزراء کے لیے کوئی ایس او پیز یا قانون نہیں، یہ وزیر بنتے ہیں انہیں قانون کو روندنے کا اختیار مل جاتا ہے ۔

ان کا کہنا ہے کہ وزیر اعلیٰ خود نجی تقاریب میں شرکت کررہے ہیں، سندھ حکومت کے کراچی دشمن فیصلے ملک کے خلاف سازش ہیں، سندھ حکومت کی ڈرامے بازیاں صرف معیشت تباہ کرنے کے لیے ہیں ۔

انہوں نے مزید کہا ہے کہ کراچی سمیت پورے سندھ میں پی پی کے علاوہ سب کے لیے لاک ڈاؤن ہے، کراچی کی عوام اس دو نمبر سندھ حکومت کو پہچان چکی ہے، کراچی کی عوام اس کراچی دشمن حکومت کے خلاف خود فیصلہ کرے ۔