پنجاب کے مختلف شہروں میں آج سے لاک ڈاؤن میں تبدیلی

تفصیلات کے مطابق این سی او سی کی اور  گورنمنٹ پنجاب کی سفارشات کے مطابق پنجاب کے منتخب اضلاع میں لاک ڈاون نافذ کیا گیا،  سیکرٹری پرائمری اینڈ سکینڈری ہیلتھ کیئر سارہ اسلم نے 3 اگست کےلاک ڈاون آرڈر میں ترمیم کا نوٹیفیکیشن جاری کر دیا، نوٹیفکیشن کے مطابق منتخب اضلاع  میں  آج سے 31 اگست تک ان ڈور شادی تقریبات پر مکمل  پابندی عائد کردی گئی ہے جبکہ آؤٹ ڈور شادی تقریبات میں صرف 300 افراد شرکت کر سکیں گے۔ ترمیم شدہ نوٹیفکیشن میں یہ بھی کہا گیا ہے کہ تقریب رات 10 بجے تک ختم کرنا ہوگی جبکہ دیگر انڈور تقریبات پر پابندی ہوگی۔ تمام قسم کی مذہبی ، ثقافتی اور دیگر تقریبات کو انڈور منعقد کرنے پر پابندی ہو گی۔

ضلعی انتظامیہ اور پولیس مل کر ان ایس او پیز کا اطلاق یقینی بنائیں گے۔ تمام شہری ماسک کی پوری طرح پابندی کریں گے، سیکرٹری پرائمری اینڈ سکینڈری ہیلتھ کیئر سارہ اسلم  نے عوام سے گزارش  کی ہے کہ وہ  ماسک پہنیں ،بار بار ہاتھ دھوئیں۔ سماجی فاصلے کو برقرار رکھیں۔  تمام ایس او پیز پر سختی سے عمل کریں۔

خیال رہے کہ کورونا کے بڑھتےکیسز کے پیش نظر لاہور  سمیت پنجاب کے 4 شہروں میں آج سے   اسمارٹ لاک ڈاؤن نافذ کردیا گیا ہے ۔

واضح رہے کہ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں گزشتہ 24 گھنٹوں میں کورونا سے مزید53فراد چل بسے ۔ ملک میں  اموات کی مجموعی تعداد23 ہزار918ہوگئی ہے،جبکہ  متاثرہ افراد کی مجموعی تعداد 10لاکھ71ہزار620ہوگئی ہے ۔