تحریک انصاف کا فیصل واوڈا سے سینیٹ کاٹکٹ واپس نہ لینےکافیصلہ

تفصیلات کے مطابق وزیراعظم عمران خان کی زیرصدارت تحریک انصاف کے پارلیمانی بورڈ کا اجلاس ہوا،اجلاس میں سینیٹ الیکشن کے لیے  چاروں صوبوں میں تقسیم ٹکٹوں پر نظرثانی کی گئی جبکہ  ٹکٹ حاصل کرنے والے ارکان پر اعتراضات کاجائزہ لیاگیا۔ زرائع کے مطابق  پارلیمانی بورڈ نے سندھ میں  فیصل واوڈا سے متعلق کارکنان کے اعتراضات مستردکرتے ہوئے  فیصل واوڈا کو دیاگیا ٹکٹ برقراررکھنے کافیصلہ کیا ہے ۔ ذرائع کے مطابق وزیراعظم کاکہناہے کہ فیصل واوڈا کی پارٹی کیلئے خدمات ہیں ۔

پارلیمانی بورڈ نے خیبرپختونخواسے لیاقت ترکئی کوپارٹی ٹکٹ دینے  اور نجیہ اللہ خٹک سے پارٹی ٹکٹ واپس لینے کا فیصلہ  ہے ۔ ذرائع کا کہنا ہے کہ  وزیراعظم نے نے سینیٹ کی ٹکٹوں پر  سندھ کی تنظیم کو آج شام ویڈیو لنک پر اعتماد میں لینے کا فیصلہ کیاہے جس میں وزیراعظم  ارکان صوبائی و قومی اسمبلی کے تحفظات دور کریں گے۔

یاد رہے کہ رکن قومی اسمبلی اور وفاقی وزیر آبی وسائل  فیصل واوڈا کو سینیٹ کا ٹکٹ دینے پر اپوزیشن جماعتوں  کی جانب سے خاصی تنقید کی  گئی ہے ۔ اس کی ایک وجہ ان پر الیکشن کمیشن میں گذشتہ ڈھائی برسوں سے دوہری شہریت سے متعلق نااہلی کا زیر سماعت کیس ہے۔ اس کے ساتھ ساتھ تحریک انصاف سینٹرل سندھ ریجن کے عہدیداروں نے سینیٹ کے ٹکٹ کے معاملے پر شدید تحفظات کا اظہار کیا تھا۔

واضح رہے کہ 48 اراکین سینیٹ کو منتخب کرنے کے لیے پولنگ 3 مارچ کو ہوگی جس میں خیبرپختونخوا اور بلوچستان سے 12، 12 سینیٹرز، پنجاب اور سندھ سے 11،11 جبکہ اسلام آباد سے 2 سینیٹرز کو منتخب کیا جائے گا۔پولنگ میں چاروں صوبوں سے عام نشستوں پر 7 اراکین، 2 نشستوں پر خواتین، 2 نشستوں پر ٹیکنوکریٹس کو منتخب کیا  جائے گا جبکہ خیبرپختونخوا اور بلوچستان سے اقلیتی نشست پر ایک، ایک رکن منتخب ہوگا۔