میرے لیے پچھتاوے کی بات ہے، لیکن کچھ لوگ واپس نہیں آپائیں گے: برطانوی وزیر دفاع

تفصیلات کے مطابق برطانوی وزیردفاع بین والس ریڈیو پرگفتگو کے دوران آبدیدہ ہوگئے۔ ان کا کہنا تھا کہ میرے لیے پچھتاوے کی بات ہے، لیکن کچھ لوگ واپس نہیں آپائیں گے۔

بین والس کا کہنا تھا کہ ہمیں تیسرے ممالک کے ساتھ کام کرکے انھیں تحفظ فراہم کرنا ہے۔ میں غمزدہ اس لیے ہوں کہ میں بھی ایک فوجی ہوں۔

برطانوی وزیر دفاع بین والس نے کہا کہ یہ ایک افسوسناک بات ہے اور مغرب نے جو کرنا تھا وہ کرلیا۔ اب ہمارا کام ہے کہ ہم اپنے فرائض نبھائیں۔

انھوں نے مزید کہا کہ 20 برس کی قربانیاں رائیگاں نہ جانے دیں۔

دوسری جانب افراتفری کے بعد کابل کے حامد کرزئی انٹرنیشنل ایئرپورٹ کو بند کر دیا گیا ہے ، ہوائی اڈے کی انتظامیہ کی جانب سے جاری ہونے والے ایک بیان  میں کہا گیا ہے کہ  تمام کمرشل پروازیں بھی منسوخ کردی گئی ہیں۔کابل ایئر پورٹ پر تعینات امریکی فوجیوں نے ہجوم کو منتشر کرنے کے لیےہوائی فائرنگ کی تھی۔

اطلاعات کے مطابق اس کے بعد ایئر پورٹ پر ہلاکتوں کا خدشہ ہے۔ایران کی فارس نیوز ایجنسی کی جانب سے نشر کی جانے والی ایک ویڈیو میں ہوائی اڈے کے گیٹ کے قریب تین افراد کو زمین پر گرے دیکھا جا سکتا ہے۔