کراچی : انٹرمیڈیٹ کے سالانہ امتحانات کے دوسرے مرحلے کا آغاز

 تفصیلات کے مطابق  دوسرے مرحلے میں ہونے والے امتحانات 23 اگست سے   13 ستمبرتک  دو شفٹوں میں  جاری رہیں گے ۔  آج پہلی شفٹ میں ساڑھے 9 سے ساڑھے 11 تک سائنس جنرل،پری میڈیکل اور ہوم اکنامکس کے پرچے ہوں گے جبکہ  دوسری شفٹ میں ڈھائی سے ساڑھے4 تک کامرس،ہیومنیٹیس  اور خصوصی طلبا کے پرچے لئے جائیں گے۔

اعلیٰ ثانوی تعلیمی بورڈ کراچی  کے جاری اعلامیے کے مطابق    انٹرمیڈیٹ امتحانات میں ایک لاکھ 36 ہزار 833 طلبہ و طالبات شریک ہوں گے ۔گیارہویں جماعت کے طلبہ کے علاوہ گزشتہ سال کے نتائج سے غیرمطمئن طلبہ بھی دوبارہ پرچہ دے سکیں گے۔ اعلامیے میں بتایا گیا ہے کہ انٹر سال اول کے امتحانات کے لیے 221 امتحانی مراکز قائم کیے گئے ہیں جس میں  صبح کی شفٹ کے 113 اور شام کی شفٹ کے 108 امتحانی مراکز شامل  ہیں۔چیئرمین اعلیٰ ثانوی تعلیمی بورڈ کے مطابق نقل کی روک تھام اور کسی بھی ناخوشگوار واقعے سے نمٹنے کیلئے 2 مانیٹرنگ سیل بنادیے  گئے ہیں۔

خیال رہے کہ یہ امتحانات پہلے 7 اگست سے 3ستمبر تک ہونا تھے تاہم   کورونا کی چوتھی لہر کے باعث ملتوی کردیئے گئے تھے۔ حکومت سندھ کی جانب سے لاک ڈاؤن ختم ہو  جانے کے بعد نئے شیڈول کا اعلان کیا گیا تھا۔