پاکستان دنیا کے ساتھ ملکر افغانستان میں امن دیکھنا چاہتا ہے: وزیر داخلہ

تفصیلات کے مطابق وفاقی وزیر داخلہ شیخ رشید احمد نے پریس کانفرنس میں افغانستان کی صورتحال پر بات کرتے ہوئے کہا کہ افغانستان کی صورتحال پرتوجہ مرکوز کیے ہوئے ہیں اور ہم افغانستان میں امن اور استحکام کے خواہاں ہیں۔انہوں نے کہا کہ ایک ہزار 277 لوگوں کو امیگریشن دی گئی ہے جبکہ ہم نے 4 ہزار لوگوں کو ویزے جاری کیے ہیں اور افغان کرکٹ ٹیم کو بھی رات 12 بجے کے بعد ویزے جاری کیے جا چکے ہیں۔انہوں نے کہاکہ افغانستان کا امن پاکستان کے امن سے وابستہ ہے، کورونا مریض آئے تو بارڈر پر ہی قرنطینہ کریں گے۔

شیخ رشید احمد نے کہا  کہ چین ہماری ترقی کا زینہ ہے اور چین سے ہمارے اچھے تعلقات ہیں۔ چینی سفیر کو یقین دہانی کرائی ہے کہ سیکیورٹی دی جائے گی۔سی پیک سے متعلق بات کرتے ہوئے انہوں نے کہا کہ سی پیک ہماری معیشت کی شہ رگ ہیں، عمران خان اور حکومت کی کمٹمنٹ ہے کہ سی پیک کو آگے لیکر چلیں،  بھارت سی پیک میں کامیابی نہیں چاہتا اور پاکستان میں دہشت گردی کے واقعات میں چین کو نشانہ بنایا جا رہا ہے۔

انہوں نے کہا کہ سی پیک کے خلاف عالمی سازشیں ہو رہی ہیں اور بعض دستانے پہنے ہوئے ہاتھ نہیں چاہتے کہ سی پیک آگے جائے ۔ افغانستان کے حالات کی وجہ سے سی پیک اور اہمیت اختیار کر گیا ہے۔

وفاقی وزیر داخلہ  نے مزید  کہا کہ ہم نے 6 ڈرون خریدنے کا فیصلہ کیا ہے۔ چمن پر باب دوستی اور طورخم سرحدیں کھلی ہیں جبکہ طورخم سرحد پر لوگوں کو لا رہے ہیں لیکن لوگوں کو کابل ائیر پورٹ تک لانے کی ذمہ داری پاکستان کی نہیں ہے۔انہوں نے کہا کہ پاکستان آنے والوں میں امریکی بھی شامل ہیں اور افغان طالبان نے یقین دلایا ہے کہ افغانستان کی سرزمین پاکستان کے خلاف استعمال نہیں ہو گی۔

ان کا کہنا تھا کہ افغانستان سے آنے والے بین الاقوامی اداروں کے عہدیداران اور سفارتکاروں کو ایک ماہ کا ویزا دیا جارہا ہے، جن لوگوں کے ویزوں کی معیاد ختم ہوگئی ہے انہیں 30 اگست تک جرمانے کی معافی دی گئی ہے، وہ ویزوں کے لیے آن لائن اپلائی کریں اور اس ملک سے نکل جائیں۔