وزیراعظم کا احساس پروگرام کے تحت ملک میں مستحق گھرانوں کیلئے سکول و ظائف سکیم کا اجرا

تفصیلات کے مطابق وزیراعظم عمران خان نے احساس تعلیم پروگرام کی تقریب سے خطاب کرتے ہوئے کہا کہ بچوں کی بنیادی تعلیم بہت اہم ہے، بدقسمتی سے ہم نے بچوں کی بنیادی تعلیم پر توجہ نہیں دی، ہمارے ملک میں 2 کروڑ بچے اسکولوں سے باہر ہیں، ضروری ہے کہ ہم اسکول سے باہر 2 کروڑ بچوں کو تعلیم دلائیں۔وزیراعظم عمران خان کا کہنا تھا کہ ملک کا سب سے بڑا سرمایہ اس کے لوگ ہوتے ہیں، جب لوگوں کو تعلیم نہیں دی جاتی تو اپنے سرمائے کا نقصان کرتے ہیں، بچیوں کی تعلیم پر توجہ نہیں دی گئی، پڑھی لکھی خاتون اپنے معاشرے کو فائدہ پہنچاتی ہے۔ اس پروگرام کا اہم پہلو یہ ہے کہ اس سے سکول سے باہر بچوں خصوصاً بچیوں کو تعلیمی اداروں میں لانے میں مدد ملے گی۔

ان کاکہنا تھا  کہ اس سکیم سے تعلیم کے لیے بچوں اور بچیوں کی حوصلہ افزئی ہوگی، مغرب میں یہ تاثر پایا جاتا ہے کہ شاید ہم اپنی بچیوں کو تعلیم نہیں دلانا چاہتے حالانکہ ایسا نہیں ہے اور ہر پاکستانی اپنی بچیوں کو تعلیم کے زیور سے آراستہ کرنے کا خواہاں ہے لیکن بعض مقامات پر سکول دور ہوتے ہیں اور ٹیچر بھی نہیں ہوتے جس کی وجہ سے مسائل پیدا ہوتے ہیں۔

وزیراعظم نے مزید کہاکہ ماضی کی حکومتوں نے تعلیم کے فروغ کے لیے اپنی ذمہ داریاں پوری نہیں کیں، لوگوں کو تعلیم کے ذریعے آگے بڑھنے کا موقع نہ دینا ظلم اور ناانصافی ہے،  موجودہ حکومت کی کوشش ہے کہ غریب گھرانوں کے بچوں کو تعلیم کی سہولیات فراہم کرے، جدید ٹیکنالوجی کے استعمال سے سکول وظائف پروگرام کو شفاف بنانے اور موثر نگرانی میں مدد ملے گی۔