اداکار عمر شریف  کے بیٹے کی قوم سے دعاؤں کی اپیل

تفصیلات کے مطابق  لیجنڈ  اداکار عمر شریف  کے بیٹے جواد عمر نے کہا ہے کہ  لیجنڈ اداکار عمر شریف کی طبیعت میں کل سے مزید بہتری نہیں آئی ہے ڈاکٹروں کے مشورے کے مطابق ان کی امریکا روانگی کے لیے انتظامات کررہے ہیں ۔

جواد عمر نے کہا ہے کہ ائیر ایمبولینس کے لئے رابطے جاری ہیں۔قوم  سے درخواست ہے انکے لئےخصوصی دعائیں کریں۔ عمر شریف کئی روز سے آغا خان اسپتال میں زیر علاج ہیں ۔

گزشتہ روز وفاقی وزیر اطلاعات فواد چوہدری اورگورنر سندھ عمران اسماعیل  نے  اسپتال میں زیر علاج معروف کامیڈین عمر شریف کی عیادت کی تھی،وفاقی وزیر اطلاعات کی عمر شریف کو علاج معالجے کے حوالے سے وفاقی حکومت کی جانب سے مکمل تعاون کی یقین دہانی کرائی تھی۔بھارتی نامور کامیڈین جونی لیور کی جانب سے عمر شریف  کیلئے نیک تمناؤں کا اظہار کیا گیا  تھا۔

چند روز قبل پاکستان کے سینیئر کامیڈین اور اداکار عمر شریف کی اہلیہ زرین عمر نے مداحوں سے ان کی صحت کیلئے دعا کی اپیل بھی کی  تھی ۔ سوشل میڈیا سائٹ پر عمر شریف  کی اہلیہ زرین عمر کی جانب سے ایک پوسٹ شیئر کی گئی تھی جس میں انھوں نے لکھا  تھا  کہ عمر شریف کے لیے اگلے 24 گھنٹے انتہائی اہم ہیں۔

عمر شریف کی اہلیہ نے ایک اور پوسٹ میں  لکھا ’’میں زرین عمر اور جواد عمر حکومتی حکام کے ساتھ رابطے میں ہیں۔ ہم صرف یہ واضح کرنا چاہتے ہیں کہ عمر اور ان کے اہلخانہ نے حکومت اور کسی ادارے سے مالی امداد کی درخواست نہیں کی۔ ہم عمر شریف کا ویزا جلد سے جلد حاصل کرنے کے لیے مدد مانگ رہے ہیں۔

خیال رہے کہ عمر شریف کچھ عرصے سے کافی علیل ہیں ، وہ گردوں اور دل کے عارضے میں مبتلا ہیں ۔