آرمی چیف کا کور ہیڈ کوارٹرز کراچی کا دورہ ، آپریشنل تیاریوں پر تفصیلی بریفنگ دی گئی

پاک فوج کے شعبہ تعلقات عامہ (آئی ایس پی آر ) کے مطابق آرمی چیف جنرل قمر جاوید باجوہ نے کور ہیڈکوارٹرز کراچی کا دورہ کیا ہے، آرمی چیف کو آپریشنل تیاریوں، تربیتی نظام اور کور کے انتظامی امور پر تفصیلی بریفنگ دی گئی اور آرمی چیف کو صوبے کی موجودہ  اندرونی سیکیورٹی صورتحال سے آگاہ کیا گیا۔

 آئی ایس پی آر کا کہنا ہے کہ  رینجرز اور آرمی کی قانون نافذ کرنے والے اداروں کو امن و امان کے حوالے سے معاونت سے بھی  آگاہ کیا گیا، کراچی ٹرانسفرمیشن پلان پر عمل درآمد کیلئے فوج کی کثیر الجہتی مدد سے متعلق بھی بریفنگ دی گئی۔

آئی ایس پی آر کے مطابق آرمی چیف نے سول انتظامی کی بھرپور معاونت پر کراچی کور کو سراہا، کراچی کور شہر کی ٹرانسفارمیشن پلان کے اہم منصوبوں کی بروقت تکمیل پر ساتھ دے رہی ہے۔

آرمی چیف  جنرل قمر جاوید باجوہ نے  ہائبرڈ خطرات سے نمٹنے کے اقدامات پر بھی زور دیا۔آرمی چیف نے کہا کہ  خطے کی تازہ پیشرفت کے تناظر میں قومی ردعمل اپنانے کی ضرورت ہے۔

ترجمان پاک فوج کا کہنا ہے کہ  آرمی چیف نے خاتون پاکستان گرلز سکول کراچی کا دورہ بھی کیا، آرمی چیف نے سٹیٹ آف دی آرٹ سہولیات پر سکول انتظامیہ کو سراہا، آرمی چیف نے مستحق بچیوں کے لئے اعلی اور معیاری تعلیم کی فراہمی کی بھی تعریف کی۔