آبدوز ڈیل تنازع ، فرانس نے امریکا اور آسٹریلیا سے سفیر واپس بلالیے

فرانسیسی خبر رساں ایجنسی ( اے ایف پی ) کے مطابق  فرانس کے وزیرخارجہ نے کہا ہے کہ دونوں فرانسیسی سفیروں کو فوری طور پر واپس بلانے کا فیصلہ 15 ستمبر کو امریکا ، آسٹریلیا اور برطانیہ کے مابین انڈوپیسفک معاہدے کے بعد کیا گیا ہے ۔فرانسیسی وزیرخارجہ نے کہا ہے کہ ہمارے سفیر کو آسٹریلیا کی جانب سے آبدوزوں سے متعلق معاہدے میں دھوکا دہی پر بلایا گیا ہے۔ آسٹریلیا کا فرانس کی روایتی آبدوز خریدنے کی ڈیل توڑنا ناقابل قبول رویہ ہے۔ فرانس کی روایتی آبدوز ڈیل توڑ کر آسٹریلیا اب امریکا کی ایٹمی آبدوز خرید رہا ہے۔ اس ڈیل کی مالیت 36 ارب ڈالر سے زائد ہے۔

2016 میں ہونے والے معاہدے کے تحت فرانس نے آسٹریلیا کو آبدوزیں فراہم کرنا تھیں۔  تاہم حال ہی میں امریکا، برطانیہ اور آسٹریلیا نے ایک نئے سکیورٹی اتحاد آکوس AUKUS کا اعلان کیا ہے جس کے تحت آسٹریلیا کو نیوکلیئرآبدوزیں  مہیا کی جائیں گی اور یہ اتحاد انڈوپیسفک تعلقات کی نئی جہتیں بھی تلاش کرے گا جو علاقائی حدود سے باہر بھی ممکن ہو سکتی ہیں۔

چین نے امریکہ، آسٹریلیا اور برطانیہ کے دفاعی معاہدے کی مذمت کرتے ہوئے اسے 'انتہائی غیر ذمہ دارانہ‘ فعل قرار دیا ہے۔ چینی وزارت خارجہ کے ترجمان نے ایک پریس کانفرنس سے خطاب کرتے ہوئے کہا کہ یہ معاہدہ علاقائی امن اور استحکام کو بری طرح متاثر کرے گا اور اس سے اسلحے کی دوڑ میں شدت آ جائے گی۔