دیر بالا: جرگے میں فائرنگ، 9افراد جاں بحق،12 زخمی  

ابتدائی اطلاعات کے مطابق دیر بالا کے علاقے براول میں گانوچم کے مقام پر سڑک کی تعمیر کے تنازع کے حل کےلیے فریقین کے درمیان جرگہ جاری تھا ، جرگہ میں بحث تکرار بڑھنے کے باعث فریقین آپے سے باہر ہوگئے اورایک دوسرے پر فائرنگ کردی، جس کے نتیجے میں  9 افراد جان کی بازی ہار  گئے  جبکہ 12 زخمی ہونے کی اطلاعات ہیں ۔

بعد ازاں لاشوں اور زخمیوں کو فوری طور پر ڈی ایچ کیو دیر منتقل کردیا گیا، جہاں عملے نے 9 افراد کی ہلاکت کی تصدیق کی ہے اور 5 زخمیوں کی حالت بھی نازک بتائی جاتی ہے۔ڈی ایچ کیو اسپتال انتظامیہ کا کہنا ہے کہ  زخمیوں کو طبی امداد دی جارہی ہے جن میں 5 کی حالت تشویشناک ہے اور مجموعی اموات کی تعداد بڑھنے کاخدشہ ہے۔

ذرائع کے مطابق فائرنگ کے واقعہ کے بعد پولیس موقع پر پہنچ گئی ہے تاہم علاقے میں سخت کشیدگی اور خوف ہراس کی فضا ہے اوردوبارہ لڑائی سے بچنے کیلئے اقدامات کئے جارہے ہیں۔