افغان طالبان کے بانی رہنما  ملانور الیدن ترابی نے دنیا کو خبردار کردیا

غیر ملکی خبر رساں ادارے کو انٹرویو دیتے ہوئے افغان طالبان کے بانی رہنماؤں میں سے ایک ملا نور الدین ترابی نے طالبان کی جانب سے دی جانے والی سزاؤں پر تنقید کو رد کرتے ہوئے دنیا کو خبردار  کرتے ہوئے کہا ہے کہ  وہ افغانستان کے نئے حکمرانوں کے معاملات میں مداخلت نہ کریں۔انہوں نے کہا کہ  افغانستان میں ایک بار پھر جرائم پر سزائے موت  اور  ہاتھ کاٹنے کی سزا کا دور لوٹ آئے گا تاہم ممکن ہے اس بار سزائیں سر عام نہ دی جائیں۔

ملا نور الدین ترابی نے  کہا کہ  کابینہ عوامی سطح پر سزا دیے جانے سے متعلق غور کررہی ہے تاہم  اس حوالے سے باقاعدہ ایک پالیسی تیار کی جائے گی۔کوئی بھی  ہمیں نہیں بتائے گا کہ ہمارے قوانین کیا ہونے چاہئیں، ہم اسلام پر عمل کریں گے اور قرآن کی رو سے اپنے قوانین بنائیں گے۔

انٹرویو کے دوران ملانورالدین ترابی نے بتایا کہ  طالبان ماضی کے مقابلے اب تبدیل ہوگئے ہیں، اب طالبان ٹیلی ویژن ، موبائل ، تصاویر اور ویڈیوز کی اجازت دیں گے کیوں کہ یہ لوگوں کی اہم ضرورت ہیں اور ہم اس حوالے  سے سنجیدہ ہیں۔ان کا مزید کہنا تھا کہ  طالبان میڈیا کو اپنے پیغامات عوام تک پہنچانے کا ایک ذریعہ  سمجھتے ہیں جس کے ذریعے وہ اپنے پیغامات سیکڑوں کے بجائے لاکھوں افراد تک پہنچا سکتے ہیں۔